Tinsukia, Rymphang 25: Ki bor pahara mynta ka janmiet ki la ioh ban kem noh ia laingut ki dkhot ba shitrhem jong ka kynhun kieng atiar ENNG (Eastern Naga National Government) na Tinsukia district ka Assam.
Hadien ba la ioh ia ka jingtip kaba bniah, ki bor pulit ka Tinsukia ha ryngkat ki bor pahara ba kyrpang na ka tnat pulit ka Arunachal ki la pynlong ka jingkhynra bad ioh ban kem noh ia kitei ki dkhot ka ENNG.
Ia kine ki laingut kiba la shah kem la ithuh kum u Aehon Ngodam (40), Awany Ngodam (32) bad u Hongam Ngodam (20 snem rta).
Haba kren sha ki lad pathai khubor, u Superintendent of Police ka Tinsukia u Abhijit Gaurav u la ong ba ki bor pahara ha ryngkat ki dkhot pahara na ka tnat STF jong ka Arunachal Pradesh ki la pynlong ia ka jingkhynra kaba kyrpang ha kaba ki la ioh ban kem noh ia laingut ki dkhot jong katei ka kynhun kieng atiar.
Na kine ki dkhot ki bor pahara ki la ioh ruh ban kurup noh ia kawei ka pistol .32 mm artylli ki magazine lem bad shibun tylli ki kuli.
Dang shen ki bor pulit ka Arunachal ki la lapdien ia kawei ka ktem jaka rieh jong ka kynhun ENNG hajan khappud ka India-Myanmar hapoh Changlang district ha kaba ki la ioh ban kurup shibun bah ki tiar ialeh.
Ka kynhun E|NNG ia kaba la seng ha u bnai Kyllalyngkot 2016,ka dei kaba treikam bha ha ki bynta jong ka Tirap, Changlang bad Longding district ka Arunachal Pradesh.
Ki tyllong khubor ki iathuh ba kitei ki dkhot kieng atiar ki dei kiba donkti ha ki kam dawa pisa bad kiwei pat ki kam pyntriem ha ka thain mihngi ka Arunachal Pradesh.
