Guwahati, Risaw 18 : Ki CID na ka tnat pulit ka Assam kila kem noh ia 21 ngut ki briew halor ka jingkynnoh pyndonkam da ki kot ki sla ba shu thok ha ka por ka jingpynlong ia ka jingrung kam pulit ha kaba sdang jong une u snem.
Ka tnat CID hynnin ka sngi Nyngkong kala khot hajir ia kumba 100 ngut ki nong aplai kam na ka bynta ban pynlong ia ka jingtohkit halor katei ka jingkynnoh.
Katkum ki khubor la ong ba haduh kumba 414 ngut ki nong aplai kiba la pyndonkam da ki kot ki sla ba shu shna thok, bad halor kane la dep ban ujor case pyrshah ia ki.
Na ka liang katei ka tnat dang shen kala sdang ban bishar bniah biang ia ki kot ki sla jong ki nong aplai kam halor ka jingsuba pyndonkam da ki kot ki sla ba shu shna thok.
Katkum u heh sorkar la ong ba ki don haduh 414 ngut ki nong aplai kiba la phah da ki syrnot kiba la shu shna thok ha kaba iadei bad ka jingnang jingtip ha ka liang ka computer kaba long kaba kongsan na ka bynta kane ka jingpynrung kam.
Ki tyllong khubor kila ong ba ki trai jong ki artylli ki jaka pule computer ruh kila shah khot hajir ha ka tnat CID.Napdeng kine ki 414 ngut kila don khyndiat na ki kiba la dep ruh ban shah thung kam bad kiba la don mynta hapoh ka training jong ki pulit.
Hynrei, watla katta kiba bun na kine ki nong aplai kila kyntait ia katei ka jingkynnoh bad kam ba kila phah da ki kot ki sla kiba dei hok.
