Aizawl, Iaiong 21 :Arngut ki koidi kiba la lait phet napoh ka phatok Lunglei District Jail ha Mizoram ki la shah kem noh hynnin ka janmiet sngi Palei ba la lah.
Ki tyllong khubor ki la ong ba ia kine ki arngut ki koidi kiba la lait phet la ioh kem noh napoh ka shnong Mausen ha ka por kumba 8 baje janmiet, kata kumba 27 kilomitar napoh Lunglei District.
San ngut ki koidi, baroh kiba dei napoh Myanmar ki la lait phet napoh ka phatok district jail da kaba pynpra ia ki mawit na ki bynta ka kynroh jong ka painkhana ha ka 18 tarik mynta u bnai.Katkum ka khubor heh pulit la ong ba laingut napdeng kine ki koidi kiba la lait phet na ka phatok ki dei kiba la shah pynngat kyndon.
Na ka liang u superintendent ka phatok u la ong ba kine ki koidi ki dang don ha ka ward kaba ki shah set haduh ka por 1:30 mynstep, kata ha ka por ba ki bor pahara ki dang don ha kane ka jaka.Baroh ki don 40 ngut ki koidi hapoh kane ka ward hadien ba kitei ki koidi kila ioh ban phet krad noh.
Ia kine ki koidi kiba la lait phet ki dei kiba la tip kyrteng kum u Lalchawimawia, 24 na Tahan, Myanmar uba la donkti ha kaba pyniap ia kawei ka briew ha u snem 2021, u Lalbawihliana, 27, Dokapthanga, 26 kiba dei na Zokhawthar, u Haudeuhchhin, 25na Tlangnuam Champhai bad u Vanneihthanga, 38 snem rta uba dei na Leisen, Myanmar. Na ka liang ki bor pulit ki dang iai bteng ban pynlong ka jingthwet kaba jur ban ioh kem sa ia kitei kiwei pat ki koidi kiba dang jah rngai.
