Aizawl, Iaiong 27: Ki pulit ka Mizoram kila lap ia ka jyrsieh ha ka jingbhah pisa kaba T.150 Klur ha ka jingthied 2000 tylli ki kali snaiap da uwei u nongtrei jong ka Kompani Mahindra ha Aizawl.
Ka Special Investigation Team (SIT) kaba la thaw da ka Mizoram Police kala kem 11 ngut ki riewshimet kiba kynthup ia u nongpynwandur ia katei ka kam sniew u
Jakir Hussain uba na Tezpur, Assam, uba trei kum u Area Business Manager jongka Mahindra bad Mahindra Financial Services Limited (MMFSL) ha Mizoram.
U Director General of Police ka Mizoram u Anil Shukla, ula pyntip ba u Hussain ula pynwandur ia katei ka kam sniew ha kine ki 4 snem kiba la leit kaba la sdang naduh u snem 2020.
Ula iasuhbuit bad katto katne ngut ki nongtrei ha Bank ban shna thok ia ki kot ki sla bad ban plie ia ka Bank Account kaba thok ha ka kyrteng jongka Mahindra Finance Limited ha ka Mizoram Rural Bank Khatla Branch.
Ha kane ka kam sniew la pyndonkam ia ki buit thok naduh ka jingsoi thok ia ki kot ki sla na ka bynta ban pyllait ia ka pisa ne ka ram ban thied ia palat 2000 tylli ki kali da ki nongshim ram snaiap ne ki “ghost” customers.
La lap ruh ba ha ka jaka jong kitei ki kali ba kin poi sha kitei nongshim ram snaiap, hynrei u Hussain bad ki paralok jongu kila die ia kitei ki kali sha ki riewshimet ha ka dor kaba kham jem.
U Hussain ula siew thikna ia ka EMI ban lait na ka jingshah suba sniew halor ki Bank Account kiba shim ram. Nalor kane ha ka por ba ka Company ka leh ia ka Audit ula rah ia kitei ki kot kiba la shu shna thok na ka ophis treikam sha ka iingsah ka jong u Manoj Sunar uba ia donkti lang ha kane ka kam sniew da kaba u ioh T.15000 man la ka bnai.
Ka SIT kala lap ia ki sabut kiba paka kynthup ia ki 15 tylli ki kali thymmai kiba shongdor T. 3 Klur, Laptop, Mobile Phone, 549 tylli ki kot ki sla jongki nongshim ram kiba shu shna thok, ki muhor, ki SIM Card bad kiwei kiwei ki tiar.
Nalor kane 26 tylli ki bank account kaba kynthup jong ki nongdie kali kaba kot T. 2.5 klur la dep ban pynsangeh mardor ia ka jingpyntreikam ia kitei ki Bank Account.
U Hussain ryngkat bad ki 5 ngut kila don mynta hapdeng ha ka jingshah tohkit ha ki pulit katba 5 ngut kiwei pat ki don ha ka Judicial Custody.
Ka jingtohkit ka dang iaid shakhmat bad la khmih lynti ba kin dang don shuh shuh kiban shah kem katba ki pulit ki dang tih bniah ia kane ka jyrsieh thied kali bad la shim ruh ba kane ka jingjia kadei kaba heh tam ha ka histori jong ka Mizoram bad ha ka Thaiñ Shatei Lammihngi baroh kawei.
