Gossaigaon, Rymphang 18 :Ha kawei na ki jingjia kaba la pynher syrngiew ia kiba bun balang, uwei u riewsaid ain ba la rim ula ngat ha ka jingshah thombor da kaba shah khaleh da ka acid ha ki riew runar ki bym lah ban ithuh ha Gossaigaon, Assam ha ka miet 17 tarik mynta u bnai.
Ia une u lanot ba la tip kyrteng kum u Abdus Samad Ahmed u la shah thombor hadien ba ki runar ki la wan rung jubor hapoh ka iingsah jong u bad khaleh da ka acid na ka durkhmat ka jong u.
U Abdus Samad Ahmed uba dei na ka seng jong ki riew said ain na Gossaigaon u dei u ba shong ba sah ha ka shnong Padmabil kaba hap hapoh Gossaigaon sub-division.
Ia u Ahmed la pynkit noh mar mar shapoh Gossaigaon RNB hospital, hynrei hadien la pynkynriah noh sha Guwahati GMCH hadien ba ka jingshitom ka la ban jur.
Katkum ki khubor, la ong ba une u riew said ain u la wanphai sha la iing ha ka por 6 baje janmiet ha ka 17 tarik mynta u bnai hadien ba u la pyndep ia ki kam ki jam hapoh Gossaigaon Judicial Dandadhi Court.Hynrei, kynsan kynsan arngut ki briew ki bym lah ban ithuh ki la wan rung ha ka iing ka jong u ba khaleh da ka acid na ka durkhmat ka jong u hashwa ba kin phet krad noh na kane ka jaka.
Na ka liang ka seng ki riewsaid ain ka Gossaigaon ki la dawa ban pynshitom da kaba tyngeh pyrshah ia ki runar kiba donkti ha kan ka kam thombor bad ruh ban pynlong ia ka jingtohkit kaba bniah halor kan ka jingjia.
Kane ka jingjia ka la wanrah ka jingkhihwin kaba jur ha katei ka thain.Na ka liang ki bor pulit ki la iaid shakhmat ban pynlong ka jingthwet kaba jur ia kitei ki runar kiba donkti ha kane ka kam thombor.
