Tura, Risaw 06 : Ka long ka khyllipmat kaba kmen ia ka Tura Golfers Association haba uwei na ki dkhot Johnwell G Momin, ula shah jied ban mihkhmat ia ka Meghalaya sha ka National Gams 2023, ka ban long ha Goa ha u Naiwieng 2023 ha ka Professional Players Category.
U Johnwell G Momin, khun u Rojinush R Marak bad Promila G Momin na New Tura, Matchakolgre, Tura, ula sdang ban ialehkai golf naduh ka rta ba 14 snem hadien ka jingshah hikai ban ialehkai ia kane ka jingialang da u MLA barim ka Tura u Billykid A Sangma, uba dei ruh uwei na ki nongialehkai golf ba paw ka Ri-lum Garo.
U Johnwell Mimin un dei u nongialehkai golf ba nyngkong ka Ri-lum Garo ban ialehkai ha ka Professional level hapoh ka Ri India. Ula leit shaka PGTO Qualifying School ha u snem 2014 bad iashimbynta ha ka Chief Ministers Cup 2014 ha Shillong Golf Course kaba dei ka National Championship Cup hapoh ka Progessional Golf Tour of India (PGTI).
U Johnwell ula jop ha shitylli ki lympung ialehkai hapih ka Jylla bad kaba khatduh ka dei ka “The Cloud 9, Summer Golf Tournament” bala pynlong ha Shillong Golf course ha u Nailar 2023.
U Johnwell uba la don khun iwei, u dei u samla ba khlem kam bad uba kyrshan iala ka iing da kaba pyndonkam ia ka sap tied golf ban long kum u coach uba ai jinghikai ia kane ka jingialehkai sha ki khynnah kiba kwah nang ia kane ka jingialehkai. U ju ai jinghikai ruh ia ki Ophisar kynthup ki shipai.
Une u Nongialehkai ula pynlut por mynta ha ka jingai jinghikai ialeh golf ban kyrshan iala ka iing, ka jinghikai pyntbit ialade na ka bynta ka National Games bad ruh ka jingpynkhreh ia ka Meghalaya Police Service Mains Exam kaba ula shah jied.
Haba iakren bad u nongthoh khubor, u Johnwell ula ong ba ka golf ka dei ka jingialehkai ka bym paw paw satia ha ri-lum Garo ha kaba tang khyndiat ngut eh ki nongialehkai kiba iashimbynta ha ka Durama Golf Course, kaba don, longtrai bad sumar da ka BSF camp ha Danakgre.
Kawei na ka thong jong ka Tura Golfers Association ka long ban kyntiew bad pynpaw ia kane ka jingialehkai hapoh ka imlang sahlang da kaba pynlong ia ki training camp ha ki skulk a Tura ia kaba kila pan jingiarap bad jingkyrshan pisa ruh na ka Tnad ialehkai ka Jylla.
