Nongstoin, Naiwieng 06 : Saw ngut ki nongialehai Chess kila shah jied ban leit mihkhmat ia ka Jylla Meghalaya sha ka National Senior Chess Championship ka ban long na Nongbah Delhi naduh ka 28 tarik Nohprah 2022 haduh ka 6 tarik Kyllalyngkot 2023.
Kine ki saw ngut ki dei u Barbith Sangma, Balseng N Marak, Silkam Sangma bad u Tartush R Marak.
Ia kine ki saw ngut la jied na ka lympung ialehkai 45th Meghalaya State A Chess Championshop bala ioh pynlong da ka West Khasi Hills District Chess Association myn ha ka 4 bad 5 tarik Naiwieng ha Nongstoin Social Service Society (NSSS).
Kine ki saw ngut ki dei ki nongjop ha kane ka lympung ialehkai ba long ha Nongstoin, kaba la plie pyrda da u MLA ka thain u Bah Macmillan Byrsat bad ki jingiakhun hangne ki dei kiba la pynlong da ka swiss system kaba 6 kylla ia baroh ki nongia lehkai.
Nalor kine ki saw ngut, kiwei pat ki nongjop ha kane ka jingialehkai jong ki Khynnah Skul ki kynthup ia u Advitiya A G uba la jop ha ka U-10 boys, u Arono Ch Momin ha ka U-15 Boys, ka Amamya K Sangma ha ka U-15 Girls.
Ha ka kyrdan ialehkai jong ka West Khasi Hills, ia ka U-15 Boys la jip da u Samboklang Marwein, U-18 girls la jop da ka Angelgrace L Marshillong, U-18 Boys da u Samborlam Jyrwa.
Ka samla Gavy Jones L Marshilliang kala ioh rah iaka 1st Position Female Open Category, u Ronal Wanbor Lyngkhoi ula ioh ia ka Best Male Player bad ka samla Daphiniewkor Wahlang ia ka Best Female Player.
U Deputy Commissioner ka West Khasi Hills District bah Garod LSN Dykes IAS ula don ryngkat ha kane ka sngi kut kum u Kongsan bad hadien ba u la ai ïa ki kyntien kyrkhu kyrdoh, u la shim ruh ïa ka bynta ban sam ïa ki khusnam sha ki nongjop, ha ka jingïadon lang u GB Gunanka IFS, President ka KCA Bah KM Warjri, bah Bonney Kharbani Secretary ka MCA, Bah Richard Sun President, ki dkhot ka WKHDCA lem bad ki nongkitkam jong ki District bapher bapher.
