Shillong, Naiwieng 12: Ka Meghalaya Cricket Association ka dap da ka jingkmen bad jingsngew sarong ban pyntip ba ka Debasmita Dutta, ka nongialehkai cricket ka jylla, kala shah jied ban mihkhmat ia ka India Team C ha ka Senior Women’s T20 Challenger Trophy.
Ia katei ka BCCI Tournament yn pynlong ha Ranchi, Jharkhand, naduh ka 17 tarik u Naiwieng.
Ka Debasmita kadei kaba shong basah ha Rynjah, Shillong bad kala ialehkai cricket naduh ka rta kaba dang rit bha. Ha ka por ba ka jylla Meghalaya kam pat dei ka dkhot ba pura jongka BCCI, kane ka samla ha ka por ba ka dang pule ha Bengaluru, kala shah jied ban ialehkai na ka Karnataka Junior Team.
Kadei ka nongialehkai kaba lah ban tied bad ban kawang bol bad ka Debasmita kala wanphai sha Meghalaya haba ka BCCI kala ai ka jingithuh kaba pura ia ka jylla bad mynta kadei ka thei ialehkai kaba la rangbah bad tbit bha bad kane ka jingshah jied ka jongka kan ai mysniem ia kiwei pat ki nongailehkai kynthei ka jylla Meghalaya.
Dang shen kala ioh ia ka nam Player of the Tournament ha ka NECDC 1st Senior Women’s Interstate Friendship T20 Tournament kaba la long ha Nongkhrah, Ri-Bhoi bad kala shah pynkup burom da kaba ioh ia ka khusnam ha ka North East Cricket Development Council (NECDC) kaba la long ha u bnai Jylliew.
Ka Debasmita kala pyndep ia ka Level A Coaching Course na ka Bengaluru’s National Cricket Academy bad watla kala iashimbynta ha kiba bun ki National Camps, hynrei kam shym la poi pat sha katei ka kyrdan kaba heh.
Ha ka samoi kaba la dep, ka Ajima Sangma kala shah jied sha ka kynhun India A hynrei kam shym la ioh mih ban ialehkai pat.
Bun kila phah ia ki kyrwoh ai khublei na kylleng ki jylla bad ka thain khamtam na ki dkhot jong ka NECDC, ki nongialehkai kiba rim, ki coach bad ki nongialehkai kiba mynta.
U President ka MCA u Nababrata Bhattacharjee ula ong, “Kadei kaba la shah peitkhmat bha ha ka BCCI ha ki katto katne snem hynrei kala duh da ka said. Nga dap da ka jingkmen halor ka jingshah jied ka jongka bad nga kyrmen skhem ba kan ialehkai bha ban ioh syndon ban mihkhmat ia ka Team India ne bna ioh ialehkai ha ka Women’s Premier League.
Nga pynthikna ba kadei ban ioh ia kaei kaba kadei hok ban ioh”.
Katba u Honorary Secretary ka MCA u Gideon Kharkongor, ula ong ba kadei hok ba ka Debasmita ba kan shah jied namar kala trei shitom ha ka kam ialehkai kaba ka ieid.
“Ka jingbym kynran dien ka jongka kadei kaba hap ban ai jingiaroh bad ka kabu kaba ka ioh ban ialehkai ha ka Challenger Trophy kan plie lad ia ka ban ioh ban ialehkai ha ka kynhun ka ri India kaba hakhmat eh bad bun kiba dang khynnah bad samla kin ioh mynsiem lang” ula bynrap.
