Shillong, K’lyngkot 29: Ka High-Level Committee (HLC) hapoh ka jingialam u Myntri Kam Pohiing bad Cooperation, u Amit Shah ula ai jingmynjur ia ka T. 3027.86 klur na ka bynta ka Disaster Mitigation Project na ka bynta ki jylla bapher bapher.
Ka committee kaba kynthup ia ka Myntri Pla Tyngka, Myntri ka Rep ka riang bad Vice Chairman NITI Aayog kum ki dkhot kila ai ka jingmynjur ia ki Mitigation Project on Lightning Safety ban iada na ka jingpom u pyrthat ha ki 50 tylli ki District kiba jur ka jingpom pyrthat ha ki 10 tylli ki jylla bad ka catalytic assistance ia ki 49 tylli ki district ha ki 12 tylli kinjylla kiba mad ia ka jingtyrkhong ban ioh ia ka jingbei tyngka na ka National Disaster Mitigation Fund (NDMF).
Ka High-Level Committee kala mynjur ia ka Project ban ai jingiarap ia ki 12 tylli ki jylla kiba jur ka jingtyrkhong ha ka jinglut kaba kot T. 2022.16 Klur, ia kaba ka bhah na ka sorkar pdeng kan long T.1200 Klur. Kine ki 12 tylli ki jylla ki kynthup ia ka Andhra Pradesh, Bihar, Gujarat, Jharkhand, Karnataka, Madhya Pradesh, Maharashtra, Odisha, Rajasthan, Tamil Nadu, Telangana bad Uttar Pradesh.
Ka Committee kala ai jingmynjur ban ai jingiarap ia ki 10 tylli ki jylla kiba jur ka jingpom pyrthei ha ka jinglut kaba kot T.186.78 Klur na ka bynta ka jylla Andhra Pradesh, Bihar, Chhattisgarh, Jharkhand, Madhya Pradesh, Maharashtra, Meghalaya, Odisha, Uttar Pradesh bad West Bengal.
U Myntri Kam Pohiing ula mynjur ruh ba ia ka Mitigation Scheme for Forest Fire Risk Management ban pyntreikam ha ki 144 tylli ki District kiba don ha ki 19 tylli ki jylla ha ka jinglut kaba kot T.818.92 Klur ia kaba ka sorkar pdeng kan bhah lyngba ka NDMF & NDRF kaban long T. 690.63 Klur.
Ka jingthmu kaba hakhmat ia kane ka scheme ka long ban pyntreikam ia ki lad ban iada ia ka jingpluh ki khlaw ki btap hapoh ka ri bad ban pynkhlain bad ban ai jingkyrshan ban iada ia ka jingpluh ki khlaw kiba kongsan bad ban shim ruh ia ki lad jingiada.
Ka jylla Andhra Pradesh, Arunachal Pradesh, Assam, Chhattisgarh, Gujarat, Himachal Pradesh, Jharkhand, Karnataka, Kerala, Manipur, Maharashtra, Mizoram, Madhya Pradesh, Meghalaya, Nagaland, Odisha, Tamil Nadu, Telangana bad Uttarakhand kin hap ban aiti ia ki jingtyrwa ki jongki na ka bynta ban pyntrei ia ki kam bapher bapher ban iada ia ki khlaw na ka jingpluh, ka jingpynkhreh ia ki Forest Fire Response bad ban khmih bniah lypa ia ka jingling jingman bad kumjuh ban ialeh ban ioh biang ia ki khlaw kiba rben.
Ban pynurlong ia kajingiohi jngai jong u Myntri Rangbah duh ka ri u Narendra Modi’ na ka bynta ka ri India, ka Ministry of Home Affairs, hapoh ka jingialam jong u Amit Shah, kala shim ia ki katto katne ki sienjam ban pynthikna ba ka ndon ka jingpyntreikam pura ha kaba iadei bad ka jingwan lynshop ka bor mariang ha ka ri.
Ka sorkar hapoh ka jingialam u Modi kala shim ruh ia kiba bun ki sienjam ban iada ia ka jingduh ia ka jingim briew bad ka jingshah pynjulor ia ki jingdon jingem ha ka por ba wan lynshop ka bor mariang da kaba pynkhlain ia ka rukom treikam hapoh ka ri India.
Shwa ia kitei ki jingtyrwa, ka HLC kala ai jingmynjur ban ai jingiarap pisa ia ka NDMF na ka bynta kiwei pat ki project kum ka Urban Flood Risk Mitigation Projects ha ki 7 tylli ki nongbah kiba kongsan ha ka jinglut T.3075.65 Klur, GLOF Risk Management ha ki 4 tylli ki jylla ha ka jinglut kaba T.150 Klur bad ka Landslide Risk Mitigation ha ki 15 tylli ki jylla ha ka jinglut kaba kot T.1000 Klur.
Nalor kane, palat ia ka T.24,981 Klur lah dep ban pyllait sha ki jylla ha une u snem mang tyngkakaba kynthup ia ka T.17479.60 Klur na ka State Disaster Response Fund (SDRF) sha ki 27 tylli ki jylla, T.4808.30 klur na ka National Disaster Response Fund (NDRF) sha ki 18 tylli ki jylla, T. 1973.55 Klur na ka State Disaster Mitigation Fund (SDMF) sha ki 13 tylli ki jylla bad T.719.72 Klur na ka National Disaster Mitigation Fund (NDMF) sha ki 8 tylli ki jylla.
