Nongpoh, Jylliew 06: Ka long shisha ka khubor kaba ai mynsiem ia ki samla ialehkai football khamtam ki kynthei kiba la shah pyntbit hapoh ka shlem ai jinghikai jong ka Lyntijam ha Nongpoh, ha kaba 2 ngut ki thei ialehkai football ki la shah jied biang ban mihkhmat ia ka jylla Meghalaya ha ka 66th National School Games ka ban sa long ha Bhopal naduh ka 6 haduh 9 tarik u Jylliew 2023.
Kine ki ar ngut ki thei ialehkai football kiba la shah jied ki kynthup ia ka samla Balarisha Maring kaba shong Klass IX bad ka samla Imaia Shylla kaba shong Class X. Kine baroh arngut ki dei kiba pule ha ka Skul Saiden Secondary School, Saiden, Nongpoh.
U Bah Sumarlang Swer, kum u Coach ka Lyntijam u la pynpaw ia ka jingkmen kaba khraw halor ka jingshah jied jong kine ki ar ngut ki thei ialehkai football ban mihkhmat ia la ka jylla sha katei ka lympung ialehkai football.
Ula ong ba kane kan dei ruh ka sien kaba lai ba kum ka shlem ai jinghikai ha ka liang ka football, ka la lah ban phah ia ki samla ialehkai football ban don ha ka kynhun jong ka jylla Meghalaya.
U la ong ruh, ba kane ka jingshah jied kine ki samla ialehkai football ka dei ruh ka jingtrei minot bad ka jingpyndonkam hok ka jong ki ia ki rukom ai jinghikai bad ruh ka sap ka phong kaba ki don.
Ka Lyntijam ka la phah ia ka jingkitbok kitrwiang ia kine ki ar ngut ki samla ialehkai football kumjuh ia ka kynhun jong ka Meghalaya ba kin lah ban ialehkai bha bad ban wanrah ia ka nam ka burom ia la ka jylla na katei ka lympung ialehkai.
