Shillong, Nailar 03 : Ka Ophis ka Meghalaya State Pollution Control Board (MSPCB) ha Shillong, kala shah hiar thma hynne ka sngi Nyngkong, da ka jingshah kawang petrol bomb ha ki arngut ki riewtap khmat kiba wan da ka scooty.
Ki Nongtrei ka MSPCB ki pyntip ba kane ka jingjia kala jia hapdeng ka por 12 baje bad 12:30 baje shiteng sngi.
Ki runar kila kawang petrol bomb ha artylli ki jaka hapoh ka phyllaw jong ka MSPCB hashuwa ba kin phet krad. Hynrei donbok, ym shym la don kano kano ka jingjulor.
“Ngi la ujor ia ka ejahar ha Laitumkhrah Police Station. Ki Pulit bad ka kynhun Forensic kila hiar sha ka Ophis ka MSPCB ban lum ia ki sakhi satar” kila iathuh.
U Superintendent of Police (City) Bah Dangsan Khyriem ula pynthikna ia kane ka jingjia.
“Ki don artylli ki petrol bomb bala kawang. Ka Board kan sa ujor ia ka ejahar bad hadien ba dep kane, ngin sa register ia ka case. Ka jingtohkit kala iaid ban ioh kem ia kine ki briew ba donkti” ula ong.
Ka kynhun Forensic kala lum ia ki sakhi bad pynthikna ba kine ki dei ki petrol bomb.
Haba kylli la kane ka jingjia ka don jingiadei bad ka jingkulmar kaba mih na ka public hearing ka MSPCB na ka bynta ka project tih mawshun ka Shree Cement ha Lum Syrman, une u Heh Pulit ula ong ba ka dang kloi palat ban ong eiei ia kane.
“Ngam don jingtip. Kane ka dei shibynta jong ka jingtohkit” ula bynrap.
Ki Pulit ki dang tohkit ia ki video CCTV na ka thain bad kila pynlong ia ka jingthwet kaba jur ia kine ki arngut ki runar.
 ha Shillong, kala shah hiar thma hynne ka sngi Nyngkong, da ka jingshah kawang petrol bomb ha ki arngut ki riewtap khmat kiba wan da ka scooty.){kind=link}