Nongpoh, Rymphang 29 : Ka skul Sacred Heart Secondary School, Marmain, Ri-Bhoi District, kala shah byrngem ha ka kynhun ki paid Karbi bala tip kum ka Karbi Traditional Faith Association (KTFA) namar ka jingbuh dur Jisu, mt Maria bad kino kino ki jingshna kiba pynpaw ia ka niam Khristan.
Ka Synjuk ki Rangbah Shnong ka thain Marmain lem bad ka synjuk ki Sengbhalang-Joint Action Committee ka RBYDSO, RBYF, HYC, HITO bad AMKA, kila leit ban buh da ka jingujor hynne ka sngi Palei sha u Deputy Commissioner ka Ri-Bhoi District Arpit Upadhyaya, ba pyntip ia kane ka jingshah byrngem ka skul Sacred Heart ha Marmain, kaba don ha khappud ka Assam.
U President ka Synjuk ki Rangbah Shnong ka thain Marmain Bah Diren Klein bad u Secretary ka All Meghalaya Karbi Association (AMKA) Bistocan Timung, haba iakren bad ki nongthoh khubor, kila iathuh ba ka kynhun Karbi Traditional Faith Association (KTFA) ka dei ka kynhun ba dang shu seng ha ka 25 tarik u Rymphang ha khappud Assam.
Kane ka Seng kala byrngem ia kane ka skul Mission b aka dei ban weng noh ia u mot Jisu bad ki dur Jisu na ka skul. Kala byrngem ba lada ym weng, ka kynhun kan sa wan ban pynpra hi dalade.
Ki iathuh ba nalor kane ka kynhun, kala don ruh ka jingbyrngem lyngba ki poster jong ka kynhun Sanmilita Sanata Samaj ba na Assam, kaba la saphriang sted ha ki rynsan social media (whatsapp) ha ka thain.
Ha kajuh ka por, kine ki kynhun ki Nongialam na Marmain, kila leit ruh ban iakynduh ia u Superintendent of Police ka Ri-Bhoi bad kyntu ba un shimkhia mar mar ia kane ka kam jong kine ki riew shitniam shuwa ba kan wanrah ia ka jingthut ha ka suk ka sain.
Kila kyntu ruh ia ki bor District ba kin pynlong mar mar ia ka jingtohkit ban lap ia ki briew kiba donkti.
