Nongpoh, Nailur 24 : Kawei ka Longiing Khasi jong ka shnong Barapathar, Ri-Bhoi kaba don markhap ka Assam, kala shah byrngem byrsit ha ki nong Assam namar ka jingai sngewbha ia la ka jong ka jaka, sha ka Dorbar Shnong ba kan shna ia ka top um jong ka skhim Jal Jeevan Mission (JJM).
Kane ka Longiing ka dei jong ka Kong Juki Marwet kaba dei ka trai nongshongshnong ba pura jong ka Shnong Barapathar, Ri-Bhoi.
Ia kane la pyntip da ki Nongialam Shnong ba kynthup ia u Rangbah Shnong ka Barapathar Bah Soni Nongtri, kiba la kynnoh ba ki briew kiba byrngem ki dei ki arngut ki muslim na Assam kiba kynthup ia u Tutu Majumdar bad u Nurul Islam. La kynnoh ba kine ki briew kila byrngem ruh da ki ktien khlem akor bad ban leh sniew ia kane ka Longiing.
Lah ban kdew hangne ba ka Dorbar Shnong kala pyntrei ia ka top um jong ka skhim JJM ha ka jaka ka Kong Juki Marwet bad kane ka jingtrei mynta kala dep mar shiteng tangba la hap ban pynsangeh noh da ka jingwan khang ki bor Sorkar na Assam.
Ki Nongialam Shnong ki pyntip ba ki Ophisar ka Tnad Land and Revenue ka Assam bala synran lang bad ki Pulit kila wan ban pynsangeh ia kane ka jingtei bad thmu ruh ban pynpra hynrei da ka jingpyneh jong ki Nongshongshnong bad ka jing poi kloi ki Pulit ka Pilangkata Outpost, la lah ban khang ia kane ka jingthmu jong ki bor ka Assam.
Ki Nongialam Shnong ki iathuh ba kine ki arngut ki Muslim ba byrngem, ki dei ruh ki briew kuba ju wanrah ia ka jingkulmar hapoh ka shnong ka thaw bad kiba ju khanglad ruh ban wan rung ki kam pynroi hapoh ka Shnong.
La kynnoh ba dang ha ki snem bala leit, kine ki briew kila leit pynpra ia u maw nongrim ban shna ia ka surok shnong lyngba ka skhim MGNREGA haduh ba la mih ka huri hura kaba jur ha ka thain.
Halor kine ki jingbyrngem ia ka Longiing bad kiei kiei baroh, ka bor Shnong kala leit ban ujor da ka ejahar pyrshah ia kine ki arngut ki briew hapoh Pilangkata Outpost bad dawa ruh ia ki bor ka ain ba ki dei ban kem mardor ia kine ki nongpynthut ia ka shongsuk shongsain bad ka roi ka par jong ka Shnong.
Kumjuh ruh ka Iing jong ka Kong Juki Marwet hynne ka sngi kala leit ban buh ejahar hapoh Pilangkata Ourpost pyrshah ia u Tutu Majumdar bad ia u Nurul Islam.
Kane ka longiing kala pynpaw ruh ba ka jingtei ia ka top up JJM ka dei ban iaid beit shakhmat kumba la thmu namar kane kan wanrah ia ka jingpahuh ha ka umbam umdih ia ka shnong ka thaw.
