Tura, K’lyngkot 09 : Uwei u Dkhot ka seng ACHIK, ula shah bom haduh da poi sha ka jingiap ha ki riew runar ki bym lah ban ithuh ha West Garo Hills District, hynne ka sngi Thohdieng.
Kat kum ka kyrwoh ba pynlait da ka Ophis u Superintendent of Police, West Garo Hills, kane ka jingjia kala jia ha ka por kumba 2 baje janmiet ha Goalgaon kaba hap hapoh ka Rajabala Police Station.
Une u dkhot ka ACHIK ba iap u kyrteng u Dilseng M Sangma, uba shong ba sah ha Phulbari.
Ia u Dilseng la kit nyngkong sha Bhaitbari Community Health Centre bad hadien la pynkynriah sha Tura Civil Hospital hynrei ula khlad noh ha shiteng lynti.
U SP u pyntip ba ka kynhun ki Pulit kala don ha ka thain ban wad ia ki briew kiba donkti ha kane ka jingthombor bad ka jingtohkit kala iaid ruh ban ithuh bad kem ia ki nongleh bymman kham kloi kat kaba lah.
Namar kane ka jingjia, ki Pulit kila kyntu ia ki paidbah ba kin pynneh ia ka shongsuk shongsain bad ban kiar na ka jing sngew pher jaidbynriew, haba maham ruh ban pynsaphriang ia kino kino ki jingthoh ba aiding ne kynshoit ha ki social media, kiba lah ban wanrah ia ka jingkulmar.
Ki bor district kila shim ruh ia ki sienjam ban thaw ia ka Peace Committee kum ka lynti ban tehlakam ia ka jingkulmar.
Ki bor Sorkar kila kyntu ia ki nongshongshnong ba kin ai lem ia ki jingtip haba iadei bad kane ka jingjia lane kano kano ka kam kaba ishankhmat sha ki Police Station ba marjan lane ka Police Control Room ha Tura.
