Shillong, Iaiong 10: U bar jylla ba shah bomiap ha Mawlai Mawroh u dei u Nongtrei trei bylla ha kawei ka Iing ha Mawlai Mawroh, ia uba la tip kyrteng da u Arjun Rai bala 50 snem ka rta.
Kane ka jingjia kala jia hynne ka step por 11 baje eiei hajan kawei ka skul ki Sister, ong ka khubor Pulit.
Ki Pulit ki iathuh ba une u nongbylla ula shah thombor ha ka kynhun ki samla Khasi ba don 5-6 ngut, kiba la pan ia ka Labour Licence na u lem bad na ki paralok ba iatrei lang.
La ong ba ha kane ka por, une u Nongbylla ula iadonlang bad 2 ngut kiwei pat kynthup ia uwei pat u bar Jylla uba la mynsaw jur na ki bynta jong ka khlieh lem bad uwei u nongbylla Khasi.
Une uwei u Nongbylla bar jylla ba mynsaw u kyrteng u Raja Ram, uba la iathuh ba kine ki runar kila bom la tied ia ki da u lyngka.
Kat kum ka jingong jong u, kine ki kynhun runar kila thombor tang ia kine ki arngut ki bar Jylla hynrei ia uwei u nongbylla Khasi, kila pyllait bad khlem ktah kti satia.
Ia kine ki arngut ki bar jylla la pynkit noh sha NEIGRIHMS bad uwei u dang don hapdeng ka jingsumar ha kane ka hospital.
Ki Pulit kila register case halor kane ka jingjia bad ka jingtohkit mynta kala iaid shakhmat ban lapdien ia kine ki briew ki ba donkti ban leh ia kane ka kam.
