Shillong, Jymmang 04 : Arngut ki riew runar kila shah bom iap ha ki paidbhur jong ka Shnong Umthlong, Eastern West Khasi Hills District namar ka jingkynnoh thombor bad thmu leh beijot ia ki shikmie shikhun ha kane ka Shnong.
Kine ki arngut ki runar ki dei na ka Shnong Shyrwang bad la tip kyrteng ia ki da u Melar Kurbah ba 36 snem ka rta bad u Harmendra Kharkylliang bala 50 snem ka rta.
Kat kum ka khubor Pulit, kine ki arngut ki dei kila leit sha Umthlong ban trei bylla kum ki nongthep pipe um. Kane ka jingjia kala jia ha ka por 1 baje mynsngi.
Ki Pulit ki iathuh ba kine ki arngut ki runar kila leit rung jubor ha kane ka Longiing hadien ba kila wan shim kyaid na Laitarted bad mar syn rung ha iing, kila pynap da ka tari ia ka kmie bad hadien ba wan sa ka khun, kila pynap sa ia ka khun da ka jingthmu ban leh beijot.
Ki iathuh ba don ki briew kiba iohi ia kane ka jingjia, kila pyrta briew bad kine ki runar kila phet krad na kane ka jaka.
La iathuh ba ki para marjan marpa kila khtong ia kine ki runar bad hadien ba ioh kem, kila rah sha Iingdorbar Shnong ban tian bishar hynrei u paidbah da ka jingbitar, ula prong jubor shapoh ka Iingdorbar bad khlem da pynsngap shuh iaki nongkitkam shnong, kila bom la tied naphang ia kine ki arngut haduh ba kila mynsaw jur bha.
Ki Pulit ki iathuh ba uwei napdeng kine ki runar ula khlad hashen ia uba la tip kyrteng u Melar Kurbah katba u Harmendra Kharkylliang ula khlad ha lynti shuwa ban poi ha Civil Hospital Shillong.
Ki Pulit haba ioh jingtip ia kane ka jingjia, kila leit sha kane ka jaka ban tem ia u paidbah hynrei la iathuh ba ki paidbah kim shym la ailad satia ba kin tuklar.
Ia ka metïap u Bah Melar la kit sha Civil Hospital Mairang katba ia u Bah Harmendra uba la mynsaw jur la kit sha Civil Hospital, Shillong.
