Karimganj, Nohprah 17 :Ha kawei na ki jingjia ka bym ju kham jia koit haduh phra ngut ki khynnah skul kila shah beh skul noh namar ka jingdon bynta ha kaba shna video hapoh ka kamra klas ha Karimganj district ka Assam.
Kane ka jingjia kala jia hapoh Jafargarh Extended Higher Secondary School ha Karimganj.Napdeng kine ki khynnah skul ki kynthup ia san ngut ki kynthei bad lai ki shynrang kiba dang pule ha ka klas 9 bad klas 12.
Katkum u principal jong kane ka skul la ong ba kine ki khynnah kila shna ia ka video ha ki kynta por bam ja shiteng sngi.Ula ong ruh ba ki bor pyniaid skul kila ioh jingtip halor kane ka jingjia hadien ba ka video kala saphriang kylleng.Nalor kata ula ong ruh ba kila khot ia ki kmie ki kpa jong kine ki khynnah bad pynshai halor ka rai beh skul pyrshah ia ki.
“Baroh ki don phra ngut ki khynnah.San ngut ki dei ki kynthei bad lai ki shynrang. Kila shna ia kane ka video ha ka 13 tarik mynta u bnai ha ka por bam ja shiteng sngi hadien ba kane ka video kala saphriang kylleng.Ha ka 14 tarik kaba bud hadien ba ngi la wan sha skul ngi la iamir jingmut lang bad ki nonghikai jong ngi bad shim ia ka rai ban shim ka jingpynshitom pyrshah ia kine ki khynnah.Ngi la khot ia ki kmie ki kpa bad maham ia ki ba kine ki khynnah kim dei ban mlien shuh ia kiba kum kine ki jingleh hadien habud,” ong u Principal.
Shuh shuh ula ong ruh ba kane ka skul ka duna ha kaba iadei bad ka jingdon ki nonghikai na ka bynta ki klas kiba kham shalor bad hateng hateng ka long kaba shem shitom na ka bynta jong ki ba kin lah ban tehlakam ia ki khynnah skul.
