Shillong, Lber 27: Ka Assam Rifles kala pynlong ha ka sien ka baar ia ka Assam Rifles Annual Women’s Football Tournament na ka bynta ki kynhun ialehkai ki kynthei na kylleng ki jylla ka thain Shatei Lam Mihngi bad ka kynhun ialehkai ka Assam Rifles kala iohrah ia ka nam lahduh da kaba pynrem ia ka Tripura ha ka phainal.
Ia kane ka lympung ialehkai la tip kum ka Sentinels Cup kaba iahap bad ka matpdeng jong ka Assam Rifles kaba la tip kum ka ‘Sentinels of the North East’.
Kila don 7 tylli ki kynhun ialehkai football jongki kynthei na ka jylla Meghalaya, Assam, Nagaland, Tripura, Arunachal Pradesh, Mizoram bad ka Assam Rifles kiba la iashimbynta ha kane ka jingiakob kaba la sdang naduh ka 16 tarik u Lber.
Ha ka wat kaba nyngkong jong kane ka lympung ialehkai la pynlong ha Lokra, Assam bad ia ka Semifinal kaba nyngkong, ka jingiakhun kala long hapdeng ka Assam Rifles pyrshah ia ka Meghalaya bad ha ka semi final ka baar kala long hapdeng ka Tripura pyrshah ia ka Assam.
Ka Assam Rifles bad ka Tripura kila iakhun ia ka phainal hynne ka sngi Palei ha Laitkor Garrison jong ka Assam Rifles ha Shillong bad ka Assam Rifles kala long ka lahduh ha kane ka lympung iakob ialehkai football ki kynthei kaba la pynshongshit ruh ia ki paidbah kiba la wan ban sakhi ia kane ka jingialehkai football.
U Lt Gen Vikas Lakhera, AVSM, SM, Director General Assam Rifles bad ka Vibha Lakhera ka President jongka ARWWA kila sam ia ki khusnam sha ki nongjop kaba la ioh ia ka song pisa kaba T. 3,50,000.
Ka Assam Rifles, ka la shimkhia ban kyntiew ia ki kam ialehkai bad ban ai mynsiem ia ki samla ba kin kiar na ki kam kieng atiar bad na u droks bad kumjuh ban ithuh ia ka sap ka phong kaba don kyrhai ha ki samla ka thain shatei lam mihngi.
Ka Assam Rifles kala iatehlok ruh bad ka Bhaichung Bhutia Football Academy na ka bynta ban lap bad ban sei ia ki nongialehkai football kiba tbit na ka thain shatei lam mihngi da ka jingthmu ban kyntiew ia ki sienjam kiba la shim da ka sorkar pdeng lyngba ka Khelo India Abhiyan bad ka Fit India Movement.
