Nongpoh, Naiwieng 12: Ki sim Amur Falcon kila sdang ban wan poi mynta da ki lak tylli ha ka thain Tyrso-Umru, Ri-Bhoi District, kaba dei ka jaka shongthait ha ka jingiaid lynti jong ki (migrate) ban leit sha ki jaka ba syaid.
Kum ka sienjam ban ai jingiada kyrpang ia kine ki sim ba kin lait na ki jingshah pyniap, ka Tyrso Valley Wildlife Protection Society (TVWPS), kala prat lynti ban ai ia ka jaka sah ba shngain ia kine ki sim da kaba pynlong ia ka tamasa kaban iaid mynta 7 snem.
Kane ka Seng mynta u snem kala pynbna ban pynlong ia ka 7th Amur Falcon Festival 2023 ha ka 14 bad 15 tarik Naiwieng ha ka shnong Tyrso, Ri-Bhoi District.
Ia kane ka tamasa la pynlong ha ryngkat ka jingiatreilang bad ki kynhun ka thain Tyrso, bad ka dei kaba ju pynlong manla u snem kum ka jingrakhe bad ainam ia ki sim Amur Falcon kiba ju wan sah kane ka thain da ki lak tylli ha ka shisien shisnem.
U Bah Alos Nongpoh, Secretary ka TVWPS, ha ka kyrwoh u la pynpaw ba ka jingpynlong ia kane ka tamasa ki sim Amur Falcon ka dei ruh kum shibynta ban pynphriang ia ka khubor halor ka jingdonkam ban iada bad pynsngewthuh ia ki paidbah ba kin ym pyniap pathar ia ki mrad ki mreng bad ki sim ki doh.
“Ka shnong Tyrso bad Umru ha Ri Bhoi District, ki dei ki shnong ba kine ki sim Amur Falcon ki ju wan ban jngoh bad iuhkjat shisien shisnem.Kum ka jingpynsahnam ia kine ki sim kiba wan her da ki phew hajar kilometer sha kane ka thain, ka seng ka ki la shimkhia ban ai jingiada ia kine ki sim da kaba rai ban nym siat pyniap shuh ia ki naduh u snem 2015 terter”, ong u Bah Nongpoh.
U la ong ruh, ba ka TVWPS lem bad ki Rangbah Shnong kumjuh ki seng bapher bapher ki don ka jingangnud ba ka sorkar jylla Meghalaya khamtam ka tnad Tourism, kan ai ka jingithuh kaba kyrpang halor ka jingwan jong kine ki sim Amur Falcon da kaba buh noh ha ka almanak jong ka jylla bad ban pynlong ia kane ka tamasa kaban ithuh kyrpang hapoh ka almanak jong ka tnad Tourism khnang ba kane ka shnong ka thain kan ioh ia ki lad jingiarap kum ka jingdonkam ia ki jaka sah bad jaka shong pyngngad jong ki nongwan jngohkai pyrthei na kylleng ki jylla bad ki ri kiba ju sngewtynnad ia kum kine ki tamasa.
Na ka liang ka Tyrso Valley Wildlife Protection Society, ka la khot la wer ia ki paidbah nongshong shnong ka jylla Meghalaya ba kin wan iashimbynta lang ha kane tamasa jong ki sim Amur Falcon bad ban wan sakhi ia kine ki sim kiba wan ban jngoh bad iuhkjat shisien shisnem ha kine ki thain Tyrso.
