Shillong, Rymphang 06 : Ka Mawlai kala sdang ban wan dur kum kata ka “Model Constituency” kaba la phoh sniew bad angnud ban pynurlong da u MDC ba mynta ka Mawlai Bah Teibor Pathaw, uba iakhun mynta ban wanphai biang kum u Nongmihkhmat sha ka Iingdorbar ka Khasi Hills Autonomous District Council (KHADC).
U Bah Teibor Pathaw ula mih biang kum u kyrtong shimet ban iakhun ia kane ka elekshon MDC ka KHADC, ban long la 21 tarik Rymphang, kaba la wan jia ruh hadien ka jingkyrpad ki paidbah ba un iakhlad lok noh bad ka National People’ Party (NPP).
Haba iakren bad Ka Shlem, u Bah Teibor Pathaw ula ong “Ka jingangnud jong nga ba hakhmat eh ka long ban pynkylla ia ka Mawlai constituency kum ka ‘Model constituency’- ka constituency kaba la kiew shakhmat ha ka roi ka par, kaba itynnad, kaba khuid ba suba bad kaba don ia ki nongshongshnong kiba bit ba biang nadong hadong”.
Ula ong ba kane ka dei ka jingphohsniew naduh ba u mih shakhmat ban rung ha ka jylli ki kam sain pyrthei bad ban shakri ia u paidbah.
“Kane ka jingphohsniew bad ka jingangnud kam dei ka kam kaba suk ban pynurlong. Ka dei ka kam kaba jwat bha, kaba hap ban leit tynruh bad hap dem khohsiew. Ka kam hi ka dawa ia u Nongmihkhmat uba len lade na ka bynta ka bha ka miat u paidbah, uba buh ia ka jingsarong, ka jingsngewmeng, ka jingsngew hanga mei shadien” ula ong.
U Bah Teibor ula ong ba kum u MDC la 6 snem, ula iatrot ia u maw u dieng bad leit iasaid kylleng ki jaka ban pynurlong ia kane ka jingphohsniew haba bynrap “Nga sngewkmen shibun ba ki jingpyrshang ha I bor barit jong nga (tang kum u MDC), ka jingphohsniew kala sdang wan dur bad ki kam kila paw hangne ha Mawlai Constituency ba ieid eh jong nga”.
Haba kylli, u Bah Teibor ula iathuh ba kawei na kine ki kam kiba la paw ka dei ka jingsiang tiles ia ki lynti iaid kjat naduh Mawlai Iengrynghep-Petrol Pump-Nonglum-Motsyiar-Nongpdeng-Phudmuri-Mawdatbaki ka dei shibynta jong ka jingpynitynnad ia ka Mawlai (Mawlai Beutification) kaba dei shibynta jong ka ‘Model Constituency’.
Kawei pat kaba la paw, u iathuh ba ka dei ka jingbuh ia ki signboard ba thoh ia ki kyrteng jong ki Shnong ki thaw, kiba la pynieng ha man ki lad ban rung sha ki Shnong hapoh ka Mawlai constituency.
“Shuwa ba ngan long nongmihkhmat, nga iohi ia ka jingthylli bad kila don ruh ki paralok jong nga ba wankai na shabar kiba kylli ‘shaei kata ka shnong, shano don kata ka shnong’ namar ka jingbym iatip ne ithuh hynrei mynta kila don ki signboard ban pynithuh lut ia baroh” ula ong.
U Bah Teibor u iathuh ba ka “Clean & Green Mawlai’ ka dei kawei pat ka jingangnud kaba dei shibynta jong ka “Model Constituency” bad kane ka kam ka dang don ha ka jingpynkhreh ia ki jingdonkam baroh, ban lah pynurlong.
“Ha kane ka “Clean & Green Mawlai”, ka jingthmu jong nga ka long ban thungkam ia ki nongpynkhuid ia ka shnong Mawlai-ka ba ngan siew ia ki da ka tulop lyngba ka kam kaba nga la seng ban thungkam thungkam ia ki samla” ula ong.
U Bah Teibor ula ong ruh ba ka jingpyndait ia ki solar street light ruh ka dei kawei ka kam ba dei shibynta jong ka Model Constituency – kaba la dep ban tyrwa sha ki bor ba dei khmih.
Ula ong ba lada ki paidbah ki dang ibit ia u ban long biang u nongmihkhmat ha kane ka elekshon ba mynta, ka Mawlai kan sa nang iohi shuh shuh ia ki kam kiba u don jingthmu ban leh ban kyntiew shakhmat ym tang ia ka Mawlai constituency hynrei ia baroh ki paid nongshongshnong.
