Shillong Rymphang 29: U Samla Jayden Rahaman Pariat ula sdang ia u snem da kaba khur ia ka jngjp, ha kaba ula jop 5 sien na ki 6 tylli ki jingiakob niah kali ha ka MRF MMSC fmsci Indian National Car Racing Championship ha ka Premier Formula 2000 Class kaba la long ha Madras International Circuit, hajan Chennai bad kane ka jingjop u Jayden kala wanrah nam bad burom ia ka Meghalaya.
U Jayden R Pariat uba dang don 17 snem ka rta, uba la wanphai da ka jingjop ha ka jingia shimbynta haka British F4 Championship ha u snem 2023, mynta ula iohrah ia ka jingjop ha kaba ula jop baroh 3 tylli ki jngiakob niah kali ha ka Second Round hadien ba ula jop 2 sien na ki 3 tylli ki jingiakob niah kali haka First Round kaba la long ha ka taiew kaba la dep.
Ula jop ia katei ka jingiakob niah kali ha kaba ula tam kput ia kiwei pat da kaba niah sted bha ia ka kali ka jongu bad ula long ruh u nongniah kali uba niah sted tam ha baroh ki sngi jong ka jingiakhun niah kali sted.
Da kaba pynlong iaka Bengaluru kum ka iing ka baar ka jongu namar ka jingiakob niah kali, u Jayden ula sdang nyngkong ia ka jingiashimbynta ha ka Meco FMSCI National Karting Championship ha u Naiwieng 2020 na ka bynta ka Indian Team MSport bad ula iakhun na ka bynta ka khusnam ha u snem ba bud bad ula ioh ia ka nam Vice-Champion ha ka fmsci X30 Nationals 2021.
Ula kynriah noh ia ka rukom niah ka jongu sha ka Open-Wheel Racing ha u 2022 bad ula iashimbynta ha ka MRF LGB1300 Challenge ha Madras International Circuit bad JK Tyre National Racing Championship ha Coimbatore’s Kari Motor Speedway.
Ha u 2022, ula ioh niah iaka Tatuus T-421 bad ula iashimbynta ha ka Final Six British F4 Races ha UK ha u Nailur bad ka jingniah bha ka jongu kadei da kaba wan baar ha ka Rookies ha Silverstone, uba nyngkong eh u nong India bad ula wan ha ka kyrdan kaba hynneiw.
U Jayden Pariat, uba dei shi bynta jong ka Argenti Motorsports, ula pyni ia la ka sap ka phong ha kaba ula ioh ieng ha ka rynsan ha ka First Round jongka ROKiT British F4 Championship ha Donington Park ha u ïaiong 2023 bad udei u baar na ki nong India bad uba nyngkong eh na ka jylla Meghalaya ban ioh ieng ha ka rynsan jop ha ka Tatuus F4 Car hadien jongu Kush Maini ha u 2017.
Ha u Nailur 2023, udei uwei na pdeng ki 25 ngut kiba la shah jied na ka Asia Pacific ban niah ha ka Ferrari Driver Academy ha Sepang International Circuit, Malaysia.
U Jayden un bteng ia ka Formula 2000 Season bad la khmh lynti ba shen ynsa pynbna paidbah mynta u snem ia ki jingthmu ki jongu ha dewbah Europe bad India.
