Shillong, December 29: Da ka jingthmu ban pynkhlain ia ka jingshakri ki kor ki bor teknoloji, ka sorkar jylla kala pynbna ban pyntreikam iaka Tura Link lyngba ka ‘Last Mile Connectivity Project’, da kaba pynbiang ia ka 100 Mbps Internet Connection.
Ia kane la lamkhmat da ka Tnad Information Technology & Communication (IT & C).Ka Last Mile Connectivity project kadei kaba la pynwandur ban pynbiang iaka Internet ha ki kyndong kynshrot jong ka jylla Meghalaya, ban pynthikna ba man la ki nongshong shnong kin ioh jingmyntoi ban pyniasoh bad ki kor digital ha ka pyrthei bad ka jinglah ban pyntreikam iaka 100 Mbps Link ha Tura ka pyni ia ka jinglah jong ka sorkar jylla ban pynbiang iaka Internet ha man la ki thain, da kaba buh sharud ia ki jingeh bad iaka jinglong jingman jong ki jaka.
U Myntri Rangbah ka jylla u Conrad K Sangma ula ong, “Ka jingurlong kane ka sienjam ha Tura ka long kaba kongsan ha ka ban pynurlong ia ka jingthmu ban pyniasoh iaka Meghalaya lyngba ki kor teknoloji. Ngi iengskhem ban pynthikna ba baroh ki jingmyntoi ha ka juk digital kadei ban poi sha man la ki nongshong shnong bad ka Last Mile Connectivity project ka long kaba kongsna tam ha kane ka bynta.
“Nga iaroh iaka jingtrei shitom jong ka tnad IT&C, Powertel bad MeECL kiba la trei met bad mynsiem ban pynurlong ia kane sha ka jingshisha. Ka sorkar Meghalaya kan iaid shakhmat ban iatreilang ha ka jingbteng ban wanrah iaka jingkylla ha ka jylla ha ka liang jong ka Digital, ban kyntiew ia ka ioh ka kot bad ban kyntiew iaka kyrdan haka jingim jong ki paidbah” ula ong.
Kiba don bynta ha kane ka jingwanrah ia ka jingkylla ki kynthup ia ka Powertel jongka Power Grid Corporation of India Limited (PGCIL) bad ka Meghalaya Energy Corporation Limited (MeECL) kiba la trei borbah ban pynurlong ia kane ka project.
U Pravin Bakshi, IAS, Commissioner & Secretary, IT & Communications ka jylla ula ong, “Ha ka jingbym don ka kor Internet kaba biang ha Garo Hills kala buh ha ka jingeh kaba khraw bad kala ktah ia kiba bun ki kam ki jam bad ki jingdonkam kiba kyrkieh khamtam eh iaka pule puthi bad ha kaliang ka jingai jingsumar. Ka Tura Link, kaba dei shi bynta jongka Last Mile Connectivity project, mynta kala lah ban rat dyngkhong ia kitei ki jingeh”.
Ula ong, ba lyngba katei ka 100 Mbps, ki nongshong shnong ki lah ban ‘download’ ia ki kot kiba donkam, ban pyniaid shakhmat ia ki kam khaii pateng ki jongki, ban siew ia ki jingsiew khlem kano kano ka jingthud bad kane ka sienjam kaba la lamkhmat da ka tnad IT & Communications ym tang ba kan weng ia ka jingeh ha kaba iadei bad ka juk Digital hynrei kan kyntiew ruh ia ka imlang sahlang bad ia ka ioh ka kot ha Garo Hills.
