Nongpoh, Nailur 03: Ka Bethany Outreach Hospital Nongpoh, hynne ka sngi Ba-ar, ka la sdang ban pyntreikam ia ka Dialysis Unit da kaba ai jingsumar yngkong eh kawei ka longkmie na Ri Bhoi District kaba la leit shah sumar ha kane ka hospital. Kane ka jingsumar ka long kaba jop.
Kane ka Dialysis Unit ka dei kaba nyngkong eh ban don ha ki jaka sumar ha Ri Bhoi bad la la plie ia ka da ka Myntri ka Koit ka Khiah Kong Ampareen Lyngdoh, ha ka 9 tarik Nailar 2024, ha ka sngi ba pynhap pyrda ia ka jingrakhe lyngkhuh snem ba 10 jong Hospital.
Lah ban kdew ruh, ba ka dei ka jingangnud jong u trai bad nongseng ka Bethany Outreach Hospital u Dr. John L Sailo, Ryntathiang (Bam Kwai ha Dwar U Blei) ban wanrah ne pynioh ia ki lad jingsumar bapher bapher lyngba ka jaka sumar jong ka Bethany, ban pynsuk bad pynmyntoi ia ki paidbah kiba donkam ia ki jingsumar kiba kyrpang bad kiba kordor.
Ha ka 3 Tarik Nailur, ki bor ka Bethany Outreach Hospital, ki la ioh ban pyndonkam ia ka Dialysis Unit ha ka sien kaba nyngkong eh da kaba sumar ia kawei ka longkmie kaba ju leit shah sumar dialysis ha Nazareth Hospital, Shillong.
Kane ka Longkmie kala phaikhmat sha kane ka Hospital hadien ka jingtip ba kane ka hospital ha Ri-Bhoi ruh kala don ia ki tiat sumar khlem da donkam shuh ban leit sha Shillong.
