Shillong, Naitung 02: Ka kynhun tohkit bala thung da ka Tnad Housing, kala sdang hynne ka sngi Ba-ar, ia ka jingtohkit halor ka jingkynnoh sam tin sop iing ba tad-dor da ka Tnad Housing sha ki paidbah, kaba la sam lyngba ki Community & Rural Developmemt Block (C&RD) ka Jylla.
Ia kane ka kynhun tohkit la khlieh da u Joint Secretary ka Tnad Housing u LC Marak, ka ban hiar tohkit ha baroh ki 7 tylli ki District ka Ri-lum Khasi bad Jaintia.
Kane ka jingtohkit kala mih halor ka jingujor jong ka seng Hynniewtrep Youth Council (HYC) pyrshah ia ka jingkynnoh sam tin sopiing ba tad dor, kaba la thied lyngba ka Chief Minister Housing Assistance Programme (CMHAP).
Hynne ka sngi Ba-ar, ka kynhun tohkit kala hiar tohkit ia ki tin sop iing hapoh ka kudam jong ka Tnad Housing kaba don ha Lumphira, Langkyrding, ha ka jingiadonlang ki Nongialam ka HYC.
La sakhi ba ki dkhot ka kynhun tohkit kila thew thik pa thik ia ka jingrben jong ka tin, ka jingjrong ka pyngkiang bad ka lynter jong ka tin, ban pynthikna la kine ki tin bala pynpoi sha Jylla, ki dei ne ki kiba iaid kat kum ki kyndon bala buh da ka tnad.
Lah ban kdew hangne, ia kane ka tin sop iing la shalan da ka kompani Hariana Iron Works Pvt Ltd, Kolkata, West Bengal bad la pynpoi ia kine ki tin sha baroh ki District bad ki Block ka Jylla.
U President ka HYC Roy Kupar Synrem ula iathuh ba ha ka jingthew ia ki tin ha kane ka kudam ha Lumphira, la lap ba ka jingrben jong ka tin ka long tang hapdeng 40-41 mm, kaba dun ia ka 45mm bala buh da ka Tnad Housing. Ula ong ba wat ka jingkhia jongka tin ruh ka duna bha.
Ula pyntip ba jingujor jong ka HYC ia kane ka kam kala mih hadien ka jingshem ia ka jingbym bha jong ki tin bala sam ha West Khasi Hills kynthup ka Nongstoin, Sohra, Khatarshnong bad kiwei kiwei.
“Ngin sa iahiar lang bad ka kynhun tohkit sha kine ki jaka ban iapeit bad iathew iawoh ia kine ki tin. Hadien kane ka kam, ngin sa pynkhreh ia ki jingai jingmut ban sa phah sha ka Sorkar Jylla ia kaei kaba ka dei ban leh” ong u Bah Roykupar.
Kane ka kynhun tohkit kan pynlong ia ka jingtohkit ha ki C&RD Block ka East Khasi Hills haduh ka 9 tarik Naitung, bad hadien kane kan sa hiar sa sha West Jaintia Hills ha ka 12 tarik Naitung, Ri-Bhoi ha ka 13 tarik Naitung, Eastern West Khasi Hills bad West Khasi Hills ha ka 16 tarik Naitung, East Jaintia Hills ha ka 19 tarik Naitung bad South West Khasi Hills ha ka 20 tarik Naitung.
 ka Jylla.){kind=link}