Shillong, Nailar 30 : U Myntri Rangbah ka jylla Conrad K Sangma ha ka sngi Thohdieng, u la ong ba ka jingpynkylla kaba bniah ia ka Meghalaya Protection of Catchment Area Act, 1990 ka dang don ha ka jingpyrkhat khnang ba ia kane ka ain yn lah ban pyntreikam ha ka rukom kaba dei ryngkat ka jingiatreilang jong ki trai jaka bad kiwei kiwei kiba don bynta ha ka kam.
Haba jubab ha Iingdorbar, u Conrad u la ong ba ia ka Meghalaya Protection of Catchment Area Act 1990 ym shym la lah ban pyntreikam thikna namar ba kam ai da kawei pat ka lad ban thaw ia ki Catchment Area (khlaw ba don tyllong um) lait noh tang lyngba ka jingmynjur jong ki trai jaka kaba eh haduh katta katta ban pynbiang.
“Kumta, ka jingpynkylla kaba bniah ia ka ain ka dang don hapdeng ka jingpyrkhat. Ngin sa don ka jingiamir jingmut bad ki trai jaka (bad kiwei ki nongshim bynta kynthup ki dorbar shnong). Ngi long kiba loi ban pdiang ia baroh ka lad ka lynti, ka jingiakren bad baroh ki jait jingpynkylla ban pynthikna ba ia kane ka ain yn lah ban pyntreikam ha ka rukom kaba dei ryngkat bad ka jingiatreilang jong ki trai jaka (bad kiwei kiwei ki briew ba don bynta),” u la ong
U Conrad u la ong ba ka ain ka ong ba ka Sorkar ka lah katkum ka jingai jingmut jong ka advisory board bad hadien ba ka la ioh ia ka jingmynjur jong ki trai jaka, ka lah ban pynkylla ia kano kano ka jaka kum ki catchment area.
Hynrei u la ong ba ka sorkar kam shym la ioh ia ka jingmynjur da ka jingthoh na ki trai jaka ha baroh ki jaka ba la ithuh ban pynbna kum ki catchement area. Kine ki dei ki jaka kiba kongsan na kaba ki wah, ki wahduid ki mih bad ki long kum ka jaka pynpoi um sha kano kano ka sor, ka shnong ne ki dorbar pyllun.
“Kumta, nga kyrpad ia ki MLA jong ngi jong kane ka iing dorbar ba ngi donkam ban iatrei lang namar donkam ia ka jingmynjur jong ki trai jaka…(kane ka long ruh) ka khubor sha ki trai jaka ba ngi donkam ban iatreilang na ka bynta ka jingmyntoi jong ka mynta bad ka lawei ka pateng ban wan,” bynrap u Conrad.
Shuh shuh, u Myntri Rangbah u la pyntip ba ka sorkar ka la ithuh ia palat 7000 tylli ki tyllong um kiba don ha ka jingma ban duh noh ha ka jylla bad na kine, 750 tylli ki don ha ka jingshisha ha ka jinglong kaba ma bha mynta.
“Ngin sa wanrah ia ka plan (action) lyngba ka tnad Soil & Water Conservation. Ngi dang iatreilang ruh bad ka tnad PHE ban pynneh pynsah bad iada bad pynim biang ia kine ki tyllong um da kaba pyndonkam ia ki kor ki bor ka juk mynta,” u la ong.
Kham hashuwa haba pynpaw ia ka jingsngewkhia halor katei ka mat, u MLA ka UDP na Mawsynram bah Ollan Sing Suin u la kyntu ia ka sorkar ba ka dei ban sumar ia baroh ki catchment area namar ba bun kila ring tyrkhong bad rngat lut. U la ai jingmut ruh ia ka sorkar ban pyrkhat ia ka jingshim jaka na ka bynta ban iada ia ki catchment area.
Haba pynpaw ia kajuh ka jingmut, u MLA ka UDP na Mawkyrwat bah Renikton Lyngdoh Tongkhar, u la kyntu ia ka sorkar ban pynkylla ia ka ain da kaba bthah ia ki Hima ne Dorbar Shnong ba kin pynbna ia kano kano ka jaka kum ki catchment areas bala iada.
“Ha ka jaka ba ka sorkar kan ithuh bad pynbna ia ki catchment area, ai ba ka Dorbar Shnong ne u Syiem kin pynbna ia kane bad ioh ia ka jingmynjur na ka sorkar,” u la ong.
 lait noh tang lyngba ka jingmynjur jong ki trai jaka kaba eh haduh katta katta ban pynbiang.){kind=link}