Shillong, Risaw 22 : Ka Tnad Pulit kala sdang ia ka jingtohkit halor ka jingkynnoh bamsap ba kot da ki hajar klur tyngka, ba donkti da ki Engineer ka Tnad PWD bad ki Contractor ha kaba shna ia ka surok Shillong-Nongstoin-Rongjeng-Tura, kaba la mang haduh T.2366.77 klur.
“Ngi la dep register ia ka case. Ngi la sdang ia ka jingtohkit mynta. Tang katne kaba ngi lah ban batai mynta” ong uwei u Heh Pulit hynne ka sngi Ba-ar.
Haduh 9 ngut ki briew kynthup ki Engineer rangbah ka Sorkar Jylla bad ki Heh jong ki artylli ki kompani ba na Telangana bad Haryana, kila shah jer kyrteng ha ka ejaha bala mudui da u Chief Engineer ka Tnad PWD kat kum ka jingbthah jong ka Sorkar Jylla.
Hynrei une u Heh Pulit u pyntip ba haduh mynta ym pat don satia ka jingkem ia ki briew. “Ngi dang ngam jylliew ha ka jingtohkit ia kane ka case. Ngi dang bishar bniah ia ki kot ki sla bad dang lum shuh shuh ia ki sakhi” ula ong.
“Ki don shibun ki jinglehbym hok kaba pynbor ia ka Sorkar ban ujor da ka ejahar halor kane ka jingshna surok kaba kot palat T.2300 klur” ong uwei u Heh Ophisar ka Tnad PWD.
Kane ka surok kaba pyniasoh ia ka Nongbah Shillong bad ka Tura ka dei kaba la mynjur ha u snem 2010 kum shibynta jong ka Special Road Development Programme-North East jong ka Sorkar Pdeng.
Kat kum ka jingong ki Heh PWD, kane ka project ka dei kaba la mang nyngkong tang T.1303.83 klur hynrei la pynkiew ia ka mang tyngka la bun sien bad khatduh la pynkiew haduh T.2366.77 klur. Ka sngi bala buh ban pyndep ia ka project ka dei ha u snem 2014.
Napdeng ki 9 ngut kiba la jer kyrteng ha ka ejahar ki kynthup ia ki Heh jong ki artylli ki kompani shimet, u Chief Engineer barim ka PWD, u Executive Engineer bad kiwei kiwei.
Ia kane ka ejahar la ujor da u Chief Engineer ka PWD (NH) Bah AM Kharmawphlang uba la ioh ia ki jingtip hadien ka jingiaid ka mukotduma iakajia (arbitration) bala pynlong da ka Arbitral Tribunal.
Ia kane ka mukotduma la mudui da ki kompani shimet hadien ba ka Tnad kam shym la kohnguh bad ka jingdawa jong ki ban pynthymmai ia ka contract.
