Nongpoh, Nohprah 05 : Ka Amur Falcon Festival – ka tamasa ban pdiang ia ka jingwan iuhkjat ki kbeit Amur Falcon ha ka thain Mawhati, kala sdang hynne ka sngi Thohdieng bad ha kane ka kynti, la pynlong ia kane ka tamasa da ka Brup Hang Lang Tourism Promoting Society lem bad ka 7 Huts Production ha ka shnong Umtngam.
Lah ban kdew ba ki sim Amur Falcon da ki phew phew hajar tylli, kiba ju wan iuhkjat shisien shisnem ha ka thain ban shongthait shipor ha ka jingiaid lynti jong ki sha ki jaka ba syaid.
Ia kane ka tamasa ka ban neh arsngi, la plie da u MLA ka Umsning Dr Celestine Lyngdoh kum u kongsan ha ka jingiadon lang u MLA ka Mawhati Bah Charles Marngar, u Deputy Commissioner ka Ri-Bhoi Abhilash Baranwal bad kiwei kiwei.
Haba kren kum u kongsan, u Dr. Celestine Lyngdoh, u la pynpaw ia ka jingkmen kaba khraw ban ioh sakhi dalade ia kane ka tamasa kaba kham pher hapoh ka jylla Meghalaya kaba la pynlong kyrpang ban ai nam ia ka jingwan iuhkjat jong ki sim Amur Falcon kiba wan na kiwei pat ki ri ban her da ki phew hajar kilometer bad ban wan shongthait shipor ha kane ka thain Tyrso hashwa ba ki her pat sha kiwei kiwei ki jaka bad ban leit phai sha ka jaka ba ki long trai.
U Dr. Lyngdoh u la ai ruh ia ka jingiaroh ia ki nongpyniaid lem bad kiwei kiwei kiba la shimkhia ban pynlong ia kane ka tamasa kaba kham itynnad, kaba long ruh kum ka jinghikai ia kiwei kumno ba kin burom lem ia ki mrad ki mreng bad ki sim ki doh, ban kiar na ka jingpyniap pathar ia ki, kaba lah ban wanrah ia ka jingduhjait jong kum kine ki mrad khyllah.
U Dr Celestine ula kyntu ia ka Tnad Wildlife ba kan iarap lem ha ka ban pynurlong ia ka jingthreng jong ka thain ban pynrung ia kane ka tamasa ha ka almanak jong ka Tnad Jngohkai pyrthei ka Jylla.
“Kum ka shnong kaba don ia ki samla kiba la nang la stad, kala dei ia ki ba kin shna da ki kynja jingthoh ne ring dur kum ka Documentary ban pynsaphriang paidbah halor ka jingdon jong kine ki sim khyllah, ka jingwan ka jong ki ha kane ka shnong bad kumta terter”, kyntu u Dr. Lyngdoh.
La sakhi ruh ba ki paidbah kiba la wan ban shimbynta ha kane ka tamasa ki la ioh ban sakhi ia ka jingwan shong jah thait shipor jong ki sim Amur Falcon nalor kiwei kiwei ki jingpynbyrngia ba la pynlong ha kane ka tamasa.
