Shillong, Nailur 30 : Kum ka sienjam ban pyndonkam noh da ki kor digital ha ka jingpyniaid kam, ka Kynhun Myntri ka Sorkar Jylla kala sdang pyntreikam ia ka e-cabinet system, kaba pyni ia ka jingkylla sha ka rukom synshar khadar ba khlem pyndonkam shuh ia ki kot ki sla.
Haba kren sha ki lad pathai khubor hadien ka jingialang ha ka sngi Ba-ar, u Myntri Rangbah Conrad K Sangma ula pynbna ia kane ka rukom treikam ba thymmai ka ban pynlah ia ka Kynhun Myntri ban treikam online noh, ban pynlong ia ki kam shim rai kiba kham biang, kham shngain bad ka bym pyndonkam shuh ia ki kot ki sla.
Ula ong ba ka e-Cabinet system ka ailad ia ki Myntri Sorkar ba kin iohlad bad bishar ia ki kot ki sla, ki mat bad ia ki rai bala shim ha ki por bala leit da kaba khmih online na ki kor ne tiar kiba shngain bad ba kyrpang. Kane ka rukom treikam ka pynlah ban ioh ia ki rai jong ka Kynhun Myntri bala shim ha ki por bala leit noh, kan pynlah ban wad bniah bad shim nuka kat kum ki sobjek.
“Ki mat iakren jong ki jingialang Kynhun Myntri kin sa wan noh ha kane ka e-Cabinet bad ym kut tang hangne, ka jingai jingmynjur ruh kan long noh online khnang ba kan long ka Kynhun Myntri ba khlem pyndonkam shuh ia ki kot ki sla bad kaba lah ban trei ia ki kam da ki kor electronic” ong u Conrad.
