Shillong Nailar 25: Ka Sorkar Jylla hynne ka sngi Thohdieng, kala pyni paidbah ia ka rukom pynkhuid ia ki jaboh na ka pung Umiam da kaba pyndonkam ia ki AI-integrated Robotic Boat ne ki lieng robot, kiba lum ia ki jaboh jabaiñ.
Kane ka dei ka sien kaba nyngkong eh ban pyni paidbah ia kum kane ka rukom pynkhuid ia ki jaboh da ka jingiatreilang hapdeng ka sorkar Meghalaya, Smart Village Movement ryngkat bad ka UC Berkeley bad ka Clearbot.
Katei ka jingthmu ka long ban don iaka buit kaba thymmai ha kaba iadei bad ka jingpynneh pynsah iaka mariang bad da ka jingpyndonkam ia ki kor teknoloji katkum ka juk stad kaba mynta.
La sdang ia kane ka jingpynkhuid ia ki jaboh da ki Robotic Boat ha Kyndong Rella, Mawdun jong ka pung Umiam bad kan long mynta baroh shi taiew.
Kane ka jingpyninam da kaba pyndonkam ia ki Robotic Boat ban pynkhuid iaka Pung Umiam kan iarap ha kaban wanrah biang iaka jingitynnad bad jingbhabriew jong ka sawdong sawkun kane ka pung bad kan iarap ruh ha kaban pynduna iaki jaboh jabaiñ kaba pynjaboh iaka mariang.
Kitei ki Robotic Boat kila long kum ka jingwanrah iaka lad ban iakhun iaka jingjaboh ki um ki wah ha kaba ki lah ban lap bad ithuh ia ki jaka kiba lang jaboh bha, kin khmih bniah bad kin shim ia ki sienjam na ka bynta ban pynkhuid.
Kine ki kor ka AI ki lah ban lum haduh 200 Kg ki jaboh tang hapoh ka 4 kynta ba la pyntreikam ia ki bad ka jingpyndomkam ia kine ki kor ki bor ka pynishai kdar ba lyngba ki kor teknoloji lah ban ialeh ban pynneh pynsah iaka mei mariang bad ban pynsaphriang ruh ia ka khubor sha ki paidbah ban don iaka jingkitkhlieh ban ym pynjaboh ia ka mariang.
