Nongpoh, Risaw 26 : Ka Ri-Bhoi Dorbar hynne ka sngi Palei, kala lah ban pynurlong ia ka jingphohsniew ban don noh iala ka jong ka Ophis treikam ba pura, da ka jingplie ia u mawnongrim ban tei noh ia kane ka Ophis hapoh ka shnong Umsning, Sohbhala, Ri-Bhoi District.
Ia u mawnongrim la plie da u Raja Brahma, Additional Deputy Commissioner ka Ri Bhoi District, ha ka jingiadonlang u Bah E. Lyngdoh, Block Development Officer ka Umsning C&RD Block, ki nongialam ka Ri Bhoi Dorbar ba kynthup ia u President Bah RB Shadap, Secretary Bah GS Shadap, ki nongseng ia ka Dorbar ba kynthup ia u Bah RR Kynsai Makdoh bad kiwei kiwei.
Haba ai jingkren, u Bah RB Shadap u la pynpaw ia ka jingkmen halor ka jingjam jong ka Ri Bhoi Dorbar sha ka thong ban ioh noh ia la ka ophis treikam kaba pura namar kat haduh mynta kane ka kynhun kam pat la don ia la ka ophis treikam wat ha ka jingiaid lynti kaba da ki phew snem.
U la pynpaw ruh, ia ka jingkmen bad ka jingsngewnguh ia u MP ka Rajya Sabha Dr. WR Kharlukhi, halor ka jingpynmang skhim na ka MPLAD 2021-2022 ha ka jingmang pisa kaba la kot kumba 10 lak ban tei ia kane ka ophis nalor ka jingiarap jong ki bor pyniaid District.
Haba kren pat kum u kongsan, u Raja Brahma uba la kyrshan bha ia ka Ri Bhoi Dorbar ha kiba bun ki kam khamtam ha kane ka jingiaid lynti jong ka kynhun ban ioh noh ia la ka ophis treikam, u la pynpaw ia ka jingkmen ban sakhi ba kane ka kynhun ka la jam shakhmat ban ioh noh ia la ka ophis kaba pura bad kaba paka ha ki khyndiat bnai ban wan.
U la ong ruh, ba ka Ri Bhoi Dorbar ka dei kawei na ki kynhun kaba la shakri ia ka bha ka miat bad ki kam pynroi jong ki shnong hapoh kane ka district, kaba long ruh kaba kongsan tam ba kum ka kynhun kan ioh noh ia la ka jaka shong pyrkhat kam ba janai.
