Nongpoh, Nailur 25: Ha kaba sdang ka lympung ïalehkai phutbol kaba la tip kum ka 1st Damanbait Lamare Knockout Football Tournament, ha madan Umroi Nongrah, ka Pahamrioh Football Club, ka la ïoh ban khur ïa ka namjop hadien ba la la lah ban pynliem noh ia ka Ïatylli Football Club da 3-1.
Ka jingïakhun kaba itynnad bad kaba ïakhaid bha bad ha ka jingïakhun ka Ïatylli FC, ka la ïoh ban pynkhih jar nyngkong bad kaba la neh haduh ba kut ka kylla step jong ka jingïakhun.
Haba bteng ka kylla miet, ki rangïalehkai ka Pahamrioh FC, ki la lah ban ïalehkai bha bad ïoh ban pynphai ïa katei ka kol bad nalor la pynbud sa 2 kol kaba la biang pura ïa ka kynhun ba kan khur ïa ka namjop ha kaba sdang jong katei ka lympung ïalehkai.
Ïa katei ka lympung ïalehkai la wan ban plie da u Dasakhiatbha Lamare, Myntri ka sorkar jylla, nangta u Ma Ngaitlang Dhar, ki kyrtong ka NPP kiba kynthup ïa u Bah Shemphang Lyngdoh na Mawhati, u Damanbait Lamare na Umroi, u Pynhun Rynghang, General Secretary ka NPYF lem bad shibun kiwei pat.
Ka kynhun kaba ïoh ban rah ïa ka nam lahduh ha katei ka lympung, kan ïoh ban khung ïa ka song pisa kaba T. 3 lak bad kaba wan ha ka kyrdan ba-ar kan ïoh ban khur ïa ka song pisa kaba T. 1 lak, nalor kata, ki don ruh ki khusnam kiba kyrpang na bynta kito ki rangïalehkai kiba lehkai bha, ba ïoh thep bun kol bad u nongap kol ba tbit.
