New Delhi, Nohprah 14: Ka jingїakhih ba jai jai ban dawa jylla thymmai jong ka National Federation of New State (NFNS) kaba їalam da u Professor Munish Tamang, ka la sdang mynta ka sngi balang da kaba shong kyllain myngor ha madan Janatarmantar ha Nongbah Delhi.
Katei ka jingshong kyllaiñ myngor ka la sdang naduh ka por shiphew baje mynstep haduh saw baje janmiet bad ia ka Jylla Meghalaya la leit mihkhmat da ka HSPDP bad ka GNC kiba dawa ban phiah ia ka Jylla Meghalaya sha ka Khasi Jaintia State bad ka Garoland.
U President ka HSPDP bah KP Pangñiang haba їakren bad u nongthoh khubor u la ong ba ka jingdon jong ka Hill State People Democratic Party (HSPDP) bad ka Garo National Council (GNC) kum ki dkhot jong ka NFNS, ka long ka jingkyrkhu kaba khraw namar kitei ki artylli ki kynhun ki kwah ban iakhlad noh da ka jingsuk bad kim kwah da lei lei ban їakhlad lok da kaba їa bishni kawei їa kawei pat.
U la ong ba katei ka jingїalang ha Nongbah Delhi kan long ruh ka history ka ban sah jingkynmaw pateng la pateng їa ka HSPDP bad ka GNC, namar kala jia hadien lai phew san snem ka jingsaiñdur jong u (L) Maieit Hopingstone Lyngdoh bad u (L) Clifford Marak, ba la donkam ban don noh ka Khasi Jaiñtia State bad ka Garo State la ka jong.
“Kane ka jingdawa ka lah ban nym pat urlong mynta hynrei ngi kyrmen skhem ba hadien katto katne snem kan sa urlong noh” ula ong.
Ula ong ruh ba kane ka jingiakhih jong ka NFNS, kan long ban pynsngew ha u Myntri Rangbahduh ka ri Narendra Modi, ba ka por ka la dei ban nang pynkhlaiñ shuh shuh їa ka ri, da kaba thaw biang їa ki jylla ba thymmai da kaba pyshong nongrim katkum ka jinglong jong ka synshar ka khaddar, ka rirti ka dustur, ka ktien ka thylliej bad ka kyrteng jong ki jaitbynriew kiba shong ha kitei ki jylla.
Haba їakren pat bad u bah Nickman Marak Chairman ka Garo State Movement Committee (GSMC), u la ong ba ka jingleit sha Delhi kam dei tang ban pynlong їa ka jingїakhih. Hynrei ban rung ruh haduh ka Ïingdorbar Thawaiñ ba ha khlieh duh jong ka ri ka Lok Sabha bad ban aiti їa ki memorandum kiba la tynsat lang їa ki mat jingdawa ryngkat ki map kiba biang, na ka bynta ban phiah noh їa ka Meghalaya ha ki ar tylli ki jylla katkum ka kyrteng jong ka jaitbynriew, ka ktien ka thylliej, ka riti ka dustur bad ka jinglong jingman jong ki jaka.
U la ong ruh ba ka jingleit jong ki sha Delhi bad ka jingsdang jong ka jingїakhih, ka long katkum ka rai ba ki la їakut ha ka jingїalang kaba la long ha Tura ha ka 29 tarik jong u bnai Risaw ba la dep, ha kaba la їadonlang da ki nongїalam jong ka GSMC, HSPDP, Bodoland, Gurkha land, Tripraland, Kuki state, Budelkhand, Purbanchal kba la pynbeit da ka NFNS.
U la ong ruh ba mynta ka dei ka sngi kaba nyngkong jong ka jingїakhih bad ha ka 15 tarik pat, kin leit ban pynїeng їa ki lama hakhmat ka Ïing dorbar Thawaiñ Parliament namar ba ka dei ka sngi ba ka Dorbar tlang kan sdang.
