Tura, Lber 08: Da ka jingthmu ban kyntiew ia ka jingpynsngewthuh ha kaba iadei bad ka poi jingpoi ki kynthei, ka MLA jong ka Gambegre ka Dr Mehtab Chandee A Sangma kala sdang ia ka Campaign da kaba pynlong ia bun tylli ki prokram ha ki skul kiba don ha Gambegre.
Kane ka Menstrual Campaign kadei shi bynta jong ka International Women’s Day halor ka phang “Accelerate Action” bad ia kane ka Campaign la kyrshan lyngba ka Chief Minister’s Special Grant (CMSG) da ka jingthmu ban pynsngewthuh ia ki khynnah kynthei ban long kiba leh khuid leh suba bad ban sumar bha ialade.
Ia kane ka prokram la pynlong ha Mellim Deficit Secondary School ha South West Garo Hills District ha kaba palat 120 ngut ki khynnah skul kila wan iashimbynta bad la pynlong ruh ia katei ka prokram ha Daren Agal Secondary School, Kherapara UP Secondary School, Gonchudare Secondary School bad Gambegre UP Secondary School.
Hynne ka sngi Saitjain la sam kumba 1000 tylli ki Reusable Pad bad kane ka Campaign kan iai bteng kum ka jingrakhe ia ka International Women’s Day bad la buh thong ban sam ia ki Reusable Pad sha palat 10000 ngut ki kynthei bad ki longkmie kiba dei ki nongioh jingmyntoi.
“Kane ka campaign kan ai jinghikai ia ki khynnah skul bad ia ki samla kynthei ban shim ia ki lad ki lynti bad ban sumar sukher bha ialade haba ki iaid shaphrang ban jam sha ka jinglong kynthei ba pura” ong ka Dr Mehtab Sangma.
“Ka prorkam kan pynleit jingmut ha kaban shimkhia ia ki mat kiba kongsan kiba iadei bad ka menstrual hygiene, khamtam eh na ka bynta ki khynnah kynthei kiba don ha ka rta 11-18 snem, kiba shong ha ka Klas VI haduh X, kala ong.
Nalor ka jingsam ia ki Reusable Pad la ai jingbatai ruh ia ki khynnah kynthei kumno ba kin pyndonkam bad la ai jingbatai ruh ha ka ktien tynrai khnang ba kin lah ban sngewthuh bha bad la sam ruh ia ki kot kaban batai ban pynsngewthuh ba kin lah ban sumar bha ialade.
Ia kitei ki Reusable Pads la shna da ka Shubham Charitable Association, Shillong, ha kaba da ki spah ngut ki kynthei kila donkti ha kaban shna ia kine ki pads.
