Tuid ki paidbah da ki hajar ngut
Tura, Nohprah 06: Ka Me’gong Festival 2025 kala sdang da ka jingshongkun ha ka sngi Thohdieng, ha kaba u Myntri Rangbah ka jylla u Conrad K. Sangma ula plie ia kane ka jingrakhe ia kane ka tamasa kaba iadei bad ka kolshor jongka rilum Garo kaba la long ha ka sien kaba San.
Da ki hajar ngut ki paitbah kila ia tuid sha Tura, kaba la pynlong ia kane ka tamasa kum kawei na ki bor jong ka jinglong jingman ka kolshor bad ka tamasa ka tem ka put ha ka ri India.
Ha ka sngi sdang la ioh ia ka jingpynbyrngia ha ka Aski Stage. U Nongrwai Pop-Rock ba pawnam ha ka pyrthei u Richard Marx ula pynshongshit ia ki paitbah da ki jingrwai kiba pawnam bad ki jingrwai kiba thymmai na ka thup jingrwai ka jongu kaban sa pyllait ka ‘Afterhours’.
“Nga dap da ka jingkmen ban don hangne mynta ka miet bad angnud ban ioh pynbyrngia ha ka Me’gong ha ka sien kaba nyngkong eh” ula ong ia ki paidbah kiba la ia risa.
Hadien kane la ioh pat ia ka jingpynbyrngia na ka Neeti Mohan, kaba la pynshongshit ia ki paidbah lyngba ki jingrwai kiba pawnam kiba kynthup ia ka Ishq Wala Love, Jiya Re, Tu Hai Toh bad London Thumakda. Da kaba sngewtynnad ia ka rukom long rukom man ki nongpeitkai, kala ong, “Balei ngam shim la wan shane mynshwa? Ka long kaba itynnad. Phi long kiba donbon ban im ha ka bneng kaba don ha ka pyrthei”.
Kum ka dak ban ai burom ia u nongrwai uba pawnam uba la kha hapoh ka jylla Meghalaya u Zubeen Garg, ka Neeti kala rwai ia ka jingrwai Mayabini, kaba la pynsngewtynnad bad ioh ia ka jingiaroh na baroh ki riewieid jingrwai.
Ka jingshongshit ki paidbah kala sdang ban jur, haba u Julian Marley ula rwai ia ki jingrwai ‘Reggae’ katba ka kynhun Nucleya kala pynkylla ia katei ka madan kum ka jaka shad ha kaba ki nongpeitkai kila iashad da kaba bud ia ki sur kiba mih na ki jingtem.
Ki nongrwai na ka jylla Meghalaya kiba kynthup ia ka Haystack Ladies, Strum Stories bad Ahaia ruh kila pynshongshit ia ki paidbah kaba la pyniskhem syndon ba ka jylla Meghalaya kala kiew bha ha ka kolshor jong ka tem ka put bad ka rwai.
Kala don ruh ia ka jingpyninam na ki ‘Top 7’ kiba la rung ha ka Final jongka Chief Minister’s Meghalaya Grassroots Music Project (CM-MGMP) ha kaba kila ioh ban shimbynta lang ha katei ka rynsan bad ki kynhun nabar ri bad kane kala ai mynsiem ia kine ki kynhun kiba dang shu sdang kum ka Nictophilia, Magnificent Obsession, Necroscope, Emberfall, Imphaled, Misagathia and Rise & Shine.
Ka nongrwai kaba dang 19 snem jongka CM-MGMP ka Jakrima R Marak kala ong, “MGMP kala iarap ia ki nongrwai ban kiew shaphrang bad kala ai ruh ka lad ban leit iashimbynta ha ki rynsan ha kylleng ki jylla”.
Ka bam ka dih tynrai ruh kala khring bha ia ki nongwankai haba ka nongshet jingbam kaba pawnam na Garo Hills kaba la wan baar ha ka MasterChef India Season 8 ka Nambie Jessica Marak kala long kum ka nongbishar kaba kyrpang.
Ki nongiashimbynta kila pynkhreh ia ki jingbam tynrai bad ka jingpynwandur thymmai ia ka rukom shet da kaba pyndonkam ia ki jingber kiba na kylleng ka jylla Meghalaya.
Ka Jessica Marak kala iaroh ia ki nongiashimbynta kiba la sdang ban pynkhie im ia ka rukom shet ka barim bajah bad ban pyninam ia ka jingriewspah ka rilum Garo ha ka jingshet ia ki jingbam ki bapher bapher.
Nalor ka tem ka put, ka Me’gong 2025 kala don ruh ka jingpyninam ia ka kolshor kaba har rukom. Ki nongwankai kila iashimbynta ha ki jingialehkai tynrai kum ka Anding Oka, leit jngohkai ia ka Brew Village, VR Zone bad iadonbynta bad ki nongthain kti, nongshad bad ki nongiashimbynta ha ka kolshor ha kylleng ki rynsan.
Ki nongsengkam lajong kiba la ioh jingkyrshan lyngba ka PRIME Meghalaya kila pyninam ia ki jingbam tynrai, ki jingthain, ki jingdih bad ia ki tiar ki tar kaba la kyntiew ia ka lad kamai jakpoh.
Ka jingdon bun ki bynta ha ka Me’gong’s kaba kynthup ia ka jingpyniasoh ia ki jingthain kti tynrai, ka jingpynmih ia ki mar kiba la pynwandur kyrpang, ka tem ka put ha ka pyrthei bad kiwei kiwei ki jingpynbyrngia kala bteng ban pynkhlain ia ka ioh ka kot ka Meghalaya ha ka liang ka kolshor.
Kane ka tamasa kan jam sha ka sngi ka baar, ha kaba ha ka Aski Stage yn ioh ia ka jingpynbyrngia na ka kynhun Blue, Yellow Claw, Kanika Kapoor bad Prateek Kuhad, katba ha ka Kingfisher Stage yn sakhi ia ka Hoi Hoi Makbil, G-Hills Finest, Crack Gang, Rough Road bad Nokpante, ryngkat bad ka Cosplay Contest bad kiwei kiwei ki bynta kiba iadei bad ka kolshor.
