Shillong, Naiwieng 13: Kum shi bynta ban pynkhlain iaka hok ioh marbam ki paidbah, ka tnat Food, Civil Supplies and Consumer Affairs hynne ka sngi kala pynbna daka ‘Food Security Campaign’ hapoh Meghalaya.
Ia kane ka Food Security Campaign la pyllait paidbah da u Myntri ka tnat Food, Civil Supplies and Consumer Affairs Bah Comingone Ymbon bad ka thong jong kane ka Mission ka dei ban pynsngewthuh iaki paidbah halor ka National Food Security Act (NFSA) 2013 naka bynta ban rat diengkhong iaka jingshah thngan hapoh ka Jylla.
Haba kren ha kane ka sngi, u Bah Coming ula ong ba ka long kaba donkam ban pyndonkam daki Lad Pathai Khubor, ki jingialap paidbah, ki Drama, ki Film bad ki jingrwai bad ki rynsan Social Media ban pynsngewthuh paidbah halor ka NFSA 2013 khnang ba ki paidbah kin wan shakhmat ban pynrung kyrteng ialade ban ioh iaka Rashon Card.
U Bah Coming ula iathuh ba kane ka jingsdang pynsngewthuh paidbah halor ka jingioh marbam ei kadei ruh naka bynta ban pynkhreh jong ka Jylla ban pyntreikam iaka One Nation One Ration Card scheme (ONORC) kaba hap lang haka NFSA 2013.
“Lyngba kane ka Mission, ka tnat kan shimkhia ruh ban pynsngewthuh paidbah halor ka jingdonkam ban don ia u Aadhar bad ban pyniasoh lang bad ka Rashon Card namar kane kan khanglad iaki paidbah ban lehthok haba iadei bad ka jingsam marbam sha ki longïing badei ban ioh” la ong u Bah Coming.
U Bah Coming ula ong ruh ba ha kane ka Mission ki paidbah kin ioh ruh ka jinghikai, kumno ban Applai Rashon Card, ban ujor shaka tnat lada don kano kano ka jingshah lehthok, ka jingpyndonkam ePoS bad kiwei kiwei de.
“Lyngba ki Lad Pathai Khubor bad ki rynsan Social Media, ka tnat kan pynsngewthuh paidbah halor kine kine baroh namar ka sorkar ka don iaka thong ban pynthikna ba baroh kiba dei hok ban ioh marbam ei, kin ioh iala ka hok” ula ong.
Nalor kane u Myntri ula kyntu bad u iawer ia baroh kiba don jingkitkhlieh ban shim bynta haka jingpynewthuh paidbah daki jingrwai, ki video ki Film daka ktien Khasi bad Garo khnang baroh ki nong shong shnogn ka Meghalaya kin ioh ka jingsngewthuh kaba thikna halor ka NFSA 2013.
