Shillong, Risaw 26: Ka Meghalaya kala sdang ia ka jingiakhun ia ka Sub-Junior Boys National Football Championship 2025-26 (Tier 2) da kaba khur ia ka jingjop da kaba pynrem da 6-1 ia ka Chhattisgarh ha Narainpur hynne ka sngi.
Ha kane ka jingiakhun, ka Meghalaya kala ioh thep 4 kol ha ka kylla step, u Macstar Nongkynrih ha ka 33 minit, u Marbiang Marwein ula thep 2 kol bad u Wanpyndapbor Nongsiej ula thep kol ha ka 45’+2 minit.
Katba ka Chattisgarh kam shim la lah satia ban ioh thep kol eiei.
Ha ka kylla miet ka Meghalaya kala ioh thep sa 2 kol ha kaba u Iaishanborlang Khongjee ula thep kol ha ka 69 bad 78 minit katba ka kynhun jongka Chhattisgarh ka la ioh ban thep shi kol ha ka 72 minit.
U Marbiang Marbiang ula ioh ia ka nam ‘Player of the Match’.
Ka Meghalaya hapoh ka jingialam u Coach u Bah Dapmon Tariang, ka don mynta ha ka kyrdan kaba hajrong eh jong ka Group C hadien jong ka wat kaba nyngkong.
Tang ki kynhun kiba bat ia ka kyrdan kaba nyngkong na man la ki Group kin ioh ban rung sha ka Semifinal.
Ki nongialehkai ka Meghalaya kin hap ban iai bteng ban ialehkai bha bad ban khur ia ka jingjop ban nang jam shaphrang ha katei ka lympung iakob ialehkai football.
Ka Meghalaya ha ka sngi baar kan iakhun pyrshah ia ka Andhra Pradesh ha ka por 8:30 mynstep. Ka Andhra kala mad ia ka jingrem ha ka jingiakhun kaba nyngkong hynne ka step pyrshah ia ka Himachal Pradesh da 3-2.
 da kaba khur ia ka jingjop da kaba pynrem da 6-1 ia ka Chhattisgarh ha Narainpur hynne ka sngi.){kind=link}