Agartala, Rymphang 07 :Ka Myntri Rangbah (CM) ka West Bengal kaba dei ruh ka khliehduh jong ka party Trinamool Congress, ka Mamata Banerjee ka la sdang ia ka jingialap ilekshon da ka jingiaid paidbah ha Agartala mynta ka sngi 7 tarik, shibynta ka jingpynkhreh ia ka ilekshon assembly ha Tripura.
Ia ka Mamata Banerjee la synran lang ha ki nongialam ka TMC kaba kynthup ia u general secretary ka party u Abhishek Banerjee.
Kane ka jingiaid paidbah ka la sdang na Rabindra Bhavan ha Agartala.Da kaba khot ia ka Tripura kum ka iing kaba ar, ka Mamata haba kren sha ki lad pathai khubor ha ka 6 tarik mynta u bnai, ka la ong ba kane ka jylla ka la ai ia ka jinglaitluid ha kaba iadei bad ka rukom bam, ka rukom kren, bad ka riam ka beit kumba long ki Bengali.
Da kaba kynthoh pyrshah ia ka seng BJP, na ka liang ka TMC ka la ong ba ka BJP ka la pyndonkam da ki buit shukor, kata hadien ba ka party ka la kyntait halor ka jingdawa ia ka ‘Greater Tipraland’ ha Tripura katba ka la dawa la ka jong ka jylla hapoh North Bengal.
Da kaba pynpaw ka jingkyrmen kaba skhem na ka bynta ki kyrtong jong ka party ki ban ia aireng ha kane ka ilekshon assembly ha Tripura, na ka liang ka Mamata ka la ong ruh ba kane ka party jong ka, ka la iai pynpaw pyrshah halor ki kam thombor ba la leh da ka seng BJP.
