Nongpoh, Kyllalyngkot 04: Shibynta ban kyntiew ia ka sap ka phong ki heprit ba hapoh 14 snem kyrta ha ka kam ialehkai football bad ruh ban ai ia ka rynsan kaba paka ia kine ki heprit, ka Khasi Student Union (KSU), Umsning Circle mynta ka sngi ka la ioh ban sdang ia ka lympung ialehkai football kaba la tip kum ka Maitshaphrang U-14 Football Tournament kaba la pynlong ha ka madan ialehkai jong ka Umsning Town Dorbar.
La wan ban plie pyrda ia kane ka lympung ialehkai football ki heprit, da u Bah Ferdynald K Kharkamni, president ka KSU, North Khasi Hills District kum u kongsan ha ka jingiadonlang ruh u samla James Hitlar Mawphniang, general secretary, u Bah Rocky Kylla, Chairman ka Umsning Town Dorbar, u Bah Rocky Marwein, Rangbah Shnong ka Umsning Proper B nalor kiwei kiwei ki riew rangbah.
Haba kren ha kane ka sngi kum u kongsan, u Bah Ferdynald K Kharkamni, u la ai ia ka jingiaroh kaba khraw ia ki nongialam bad nongkitkam ka KSU Umsning Circle kiba la shim ia kane ka sienjam kaba kongsan ban wanrah ia kum kane ka rynsan kaba kyrpang na ka bynta ban tei ia ka lawei jong ki heprit kiba donsap ia ka kam ialehkai football khnang ba kin nang san ha ka kam ialehkai.
U la ong ruh, ba ka thong jong ka KSU hi ban pynlong ia shibun ki lympung ialehkai sport bapher bapher ha kylleng ka jylla Meghalaya, ka long ban sei ia ki samla donsap ha ki kam ialehkai bapher bapher ban ailad ruh ia ki ban pyni paidbah ia la ka sap bad khamtam eh ban phriang ia ka khubor ba kum ka seng hi ka don ban iakhun pyrshah ia ka thma pyrshah ia u drug u ba la long shisha u nongshun ba khraw jong ka Jaidbynriew khamtam u la ktah ruh ia ka lawei jong ki khun samla bad ka jingjot jong ki longiing longsem.
Haba phai sha ka jingiakhun ba la sdang mynta ka sngi, ka jingiakhun ba nyngkong, ka kynhun jong ka Eastern Ri Bhoi ka la lah ban pynliem noh ia ka Nongthymmai Sc da 1-0 bad ia ka kol jop la thep da u Me U Ba Ai Sumer u ba la ioh khur ruh ia ka nam man of the match, katba ha ka jingiakhun kaba ar pat ka kynhun jong ka Seng Samla Patarim ka la pynliem noh ia ka Laiphew Diengngan da 2-0 bad ia ki kol la thep da u Iaisynroplang Syiemlieh bad u Pynshngain Khapew bad ka nam man of the match ka la leit sha u Korishon Shabong.
