Sdang ka JNC ia ka ‘Save Jaintia Mission’ ban iada ia paid Ri-lum Jaintia

Shillong, Nohprah 14: Ka Jaiñtia National Council (JNC) hynne ka sngi Saitjain kala sdang ia ka ‘Save Jaintia Mission’ ban pynioh ia ka lawei kaba shngain ia ki pateng ban dang wan bad kumjuh ban pynioh ia ka jingithuh kaba dei ban ioh ia ki paid Jaintia, kaba ka jingangnud ka la shu sahteng haduh mynta.

“Ngi kwah ban pynbna ia ka jingsdang ia ka‘Save Jaintia Mission’ bad ha kane ka mission ngi don 5 tylli ki mat bad ka jingthmu kaba hakhmat jong kane ka long kum ka mawjam ban kyntiew ia ka jingshakri jong ngi ia ki paid Hynniewtrep, khamtam eh ia ki paidbah ka rilum Jaintia” ong u General Secretary ka JNC u Wanshwa suting.

Ula ong ruh ba ka Council kala shim ia ka rai ban sdang ia ka Save Jaintia Mission kadei naka bynta ka jingioh jingmyntoi jong ki pateng ban dang wan khamtam eh na ka bynta ki paidbah ka rilum Jaintia.

Haba dawa ia ka sorkar ba kan shimkhia mardor halor ki katto katne ki mat kiba kongsan kiba ktah ia ki paid Jaintia, u President ka JNC u Sambormi Lyngdoh ula dawa ban wanrah ia ka jingkylla hapoh ka Jaintia Hills Autonomous District Council (JHADC), haba pynpaw ia ka jingdonkam ban ioh treikam laitluid bad ban synshar dalade. Ka JNC kala pynpaw ruh ia ka jingsngewkhia halor ka jingbym don ia ka khuid ka suba ha ka rukom treikam jong ka JHADC.

Ka JNC kala dawa ruh ba dei ban ai jingithuh noh ia ka ktien Pnar kum ka ktien sorkar haba pynpaw ba ka long kaba kongsan ia ka kolshor bad ka histori jong ki paid Jaintia. Kala dawa ba dei ban pynrung noh ia ka ktien Pnar ha ka Meghalaya State Anthem bad ha ka State Language Act.

Ka JNC kala dawa ba dei ban pyntreikam ia ka Job Recruitment Policy ha ki karkhana pynmih dewbilat kiba treikam ha kylleng jong kane ka jylla ban pynthikna ba ki samla trai jylla kin ioh ia ka lad ban trei ban ioh kamai.

Kala dawa ruh ba dei ban pynbeit noh ia u pud u sam uba dang sahteng hapdeng ka jylla Meghalaya bad Assam, bad ka jingdonkam ban pyni da kaba shai ia u pud u sam khnang ba kan iada na ka jingwan kyntur pud bad ka jingiakajia pud.

Ka JNC kala dawa ruh ba dei ban khang pyrshah iaka jingtih dewiong kaba rit ne Small-Scale Mining ha ka jylla Meghalaya, da kaba pynpaw ba kane ka ktah jur ia ka mariang bad ia ka koit ka khiah da ka jingdonbynta ha kum katiek ka kam tih dewiong.

Kala kyntu iaka sorkar jylla ban shimkhia mardor halor kitei ki mat bad pynpaw ia ka jingdonkam ban don ia ka jingkhuid jingsuba, ka rukom treikam kaba shai kdar bad ka jinglah ban ai jingshakri hi dalade ia ki paidbah ha ka jylla.