Shillong, Naiwieng 30: Hadien ba la dep jurip ryngkat bad ki heh PWD u MLA ka Mawlai Konstitwensi u Bah Process T Sawkmie hynne ka sngi Balang (30 tarik u Naiwieng) u la pynpaw ia ka jingsngewkmen kaba khraw ba ki la ioh ban siang rong thymmai ia ka surok na Mawlai Petrol Pump ter ter sha Mawlai Mawroh bad mynta ki la sdang shuwa ban siang na Food Corporation of India (FCI) shaduh Ïingmane Presbyterian Mawlai Mawroh.
U pynpaw ba naduh ba tih ban siang ia ki pipe jong ka Greater Shillong Water Supply Scheme (GSWSS) phase-III, ki paidbah ki la mad jingeh bha na kadaw ka jingsniew ka surok bad shen ki paidbah kin sa lait na kane ka jingeh hadien ba la dep siang thymmai lut ia ka.
Haba ia dei bad kane ka surok bun ki paidbah ki la kynnoh leh aiu u MLA bad leh aiu ka tnad PWD, u bah Sawkmie u la pynpaw ba kane ka surok ka hap hapoh ka jong ka Central Division PWD bad naka liang jongki kim shym la shong kli kti kumjuh ka PWD bad ka jingslem ka dei ba ki ap ia ka tnad PHE ban pyndep ia ka bynta jong ka.
“Ngi sngewkmen bha mynta ba la ioh ban sdang ban siang ia kane ka surok,” ong u MLA haba kren sha ki lad pathai khubor hynne ka sngi.
Ha kajuh ka por u bah PT Sawkmie u la ai khublei kyrpang ia ka tnad PWD bad kumjuh ia u myntri bakhmih ia ka tnad u bah Prestone Tynsong, uba la mang ia ka skhim kaba 3 klur tyngka eiei na ka Skhim Central Road Fund (CRF) na ka bynta kane ka surok kaba la tip kum ka long round road.
U pynpaw ruh ia ka jingsngewkmen ban iohi ia u kontraktor ba shim ia ka kam u don ia ka jinglah ban pyntrei kaba long ka jingkyrkhu ia u paidbah.
U Bah Sawkmie u pynpaw ba ki kwah ban pyndep ia kane ka surok shuwa ka Khristmas, lada kiei kiei baroh ki iaid beit iaid ryntih. U pyntip ruh ba kin sa siang rong noh ruh na surok PHC Mawroh ter ter sha Mawkynroh.
Khatduh u Bah Sawkmie u kyrpad ruh ia kiwei ki kontraktor kiba tih na ka bynta ban siang pipe ha ki shnong bapher bapher hapoh Mawlai ba kin pynsted ia ka jingtreikam jong ki khnang ba ki paidbah kin ym mad jingeh ha ka leit ka wan jong ki.
