Sdang ka jingiakop shet “Hills on the Plate : Meghalaya Chef Wars” ha Jiocinema

Shillong, Iaiong 25: Long kiba la pynkhreh ban peit ia ka “Hills on a Plate: Meghalaya Chef Wars” kaba la sdang ha ka JioCinema ha kaba ki nongshet kiba tbit naka jylla Meghalaya kin iakob shet ia ki jingbam bapher bapher.

Ki nongshet bat bit ka jylla kin iakob shet ia ki jingbam na ka bynta ban ioh ia ka khusnam bad ha kane ka serial yn pyni paidbah ia ka jingiaid lynti ha kylleng ki jaka jong ka Meghalaya, ha kaba ki nongshet jingbam kin iakhun ha kaban shet ia ki jingbam bad ki jingtah kiba bang bad kiba phyla ha ka thaiñ.

Kane ka prokram kan sdang da ka Episode kaba Nyngkong “MEET THE 7,” ha kaba 7 ngut ki nongshet kiba tbit kin iakob shet bad ha ka Episode ka Baar, “Waterfall Trails and Turmeric Tales,” ka dei kaba la ring ha ki jaka kiba itynnad jong ka Jaintia Hills, ha kaba ki nongshet kin ngam sha ka kolshor bad ka rukom shet tynrai kaba la hiar pateng la pateng ha ka thaiñ.

Ha ka Episode kaba Lai, “Fishing for Flavors in Garo Hills,” yn pyni sha ki paidbah ia ki jingitynnad jong ki jaka, ki lum ki wah jong ka rilum Garo, ha kaba ki nongiashimbynta kin hap ban pdiang bad bat skhem ha kaba iadei bad ka jingsma bang jong ki jingtah tynrai.

Katba kiwei pat ki Episode la pynkhreh ban pyllait ha ka 27 tarik u Iaiong.

Ha kane ka Serial kan donbynta lang ka Sarah Todd jongka Master Chef Australia, Ardahun Passah bad William Diengdoh kum ki nongbishar bad u Gordon Thabah bad ka Abigail Pamei kum ki nongpyniaid.

Ki nongiashimbynta ki kynthup ia u Artet Kharsati, Ivan Suting, Adonijah Lyngdoh, Daei Suchiang, Tanisha Phanbuh bad ka Nambie Marak.

Kane ka serial ym tang ba kan pyni ia ka jingtbit bad iaka jingdon sap ki nongiashimbynta ha ka kam shet hynrei yn pyni ruh ia ka jingitynnad bad ka jingriewspah ka jylla ha ka jingdon ia ki jaka kiba itynnad bad ia ki ïew ki hat.

Ka “Hills on a Plate” kamdei eh tang ka jingiakob shet hynrie kadei ruh ka jingrakhe ia ka jingriewspah ka Meghalaya ha ka jingdon ia ki jingnang jingtip kiba naduh hyndai hynthai bad kumta ter ter.