Shillong, Naiwieng 11 : Ka Iingkashari ka District, kala sdang ban shong bishar ia ka case ba iadei bad ka jingshah pyniap u Raja Raghuvanshi, da kaba shimbishar ia kaei kaba nongmudui bad hynmen jong une uba iap, Vipin Raghuvanshi u don ban pynpaw.
Ki san ngut ki nongshah kynnoh pyniap, kynthup ka kurim u Raja, ka Sonam Raghuvanshi bad ki paralok jong ka-Raj Kushwaha, Vishal Singh Chauhan, Aakash Singh Rajpur bad Anand Kurmi- kiba pynpaw ba kim donkti satia halor ki jingkynnoh.
U Special Public Prosecutor KC Gautam ula ong ba ka chargesheet ka long kaba khlain bha bad don kumba 90 ngut ki nongsakhi.
“Tang ia u Vipin Raghuvanshi la khot bishar mynta ka sngi. Ka jingshim bishar kam pat dei satia, kan nang shim ia ka por. Kiwei, ynda la dei ka pali, kin sa hap ba wan” ong u Gautam.
“Ka jingbishar kala sdang da ka jingpynwandur ia ka chargesheet. Mynta ka sngi ka jingbishar ia ki sakhi kala sdang. Ha ka chargesheet ki don kumba 90 ngut ki nongsakhi. Ka chargesheet, nga kwah ban ong, ka dei kaba khlain bha” ula bynrap.
U Vipin Raghuvanshi, uba ai ka jingmudui ula pynpaw “Namar ba ka por kala kut noh mynta ka sngi, la buh por biang ha kawei ka sndgi, kata ha ka 26 tarik Naiwieng. Namar ka jingduna ka por, ym shym la lah ban shim jingthoh ia baroh ki jing batai jong nga (statement)”.
Kane ka mukotduma ka dei halor ka jingshah pyniap u Raja Raghuvanshi ha ka jingwan leh honeymoon sha Meghalaya ha u bnai Jymmang.
Ia ka metiap la lap na ka riat marjan ka Kshaid Wei Sawdong myn ha ka 2 tarik Jylliew bad ki Pulit ka Sohra Police Station kila aiti ia ka chargesheet kaba don haduh 790 sla.
U Superintendent of Police ka East Khasi Hills Bah Vivek Syiem ula pyntip ba ka jingpynkhreh ia ka chargesheet kaba ar kala iaid shaid shaid bad la khmih lynti ban sa aiti noh sha Iingkashari ha ka taiew ba lai jong une u Naiwieng.
