Shillong Naitung 01: Ka Inspectors General BSF-Region Commanders BGB Level Border Co-ordination Conference kaba 4 sngi, kala sdang hynne ka sngi Nyngkong ha BSF campus, Umpling.
Ia kane ka jingialang la pynlong arsien ha ka shi snem hapdeng ki shipai BSF bad ki BGB na ka bynta ban iakren halor kiba bun ki mat na ka bynta ban ia don ia ka jingiasngewthuh lang ha kaban peit bad pyniaid ia ki kam khappud hapdeng kine ki ar tylli ki ri bad ruh ban ia snohkti lang ha kaban ialeh ban iakhun pyrshah ia ki kam sniew ha ki thain khappud, ki kam pynroi kiba dang sahteng ha ki khappud bad ban shim ia ki sienjam ban tehlakam ia
ka jingrung tuh jong ki briew ha ki khappud.
Hynne ka sngi, ka kynhun jong ka Border Guard Bangladesh kala shah pdiang sngewbha ha ki heh ophisar jong ka BSF ha ICP Dawki bad hadien kane, katei ka kynhun kala leit sha Umpling BSF campus, Shillong ban iashimbynta haka jingialang jongka Co-ordination Conference kaba 4 sngi.
Ka kynhun jong ka BGB ka kynthup ia ki 13 ngut ki dkhot hapoh ka jingialam jongu Md Shazedur Rahman uba long u Additional Director General jongka Region Commander ka South East Region, Chattogram.
Katba na ka BSF kiba la mihkhmat ki don 13 ngut hapoh ka jingialam jong u Sh. Patel Piyush Purusottam Das, IPS, IG BSF Tripura Frontier ryngkat ka jingdon lang ki heh ka BSF na Meghalaya, Silchar bad Tripura bad ki heh na ka MHA, MEA bad NCB.
Kane ka jingialang kan kut ha ka 4 tarik u Naitung ha kaba kan don ka jingiasoi ia ka Joint Record of Discussion (JRD) da ki nongialam na kitei ki ar tylli ki kynhun.
