Dimapur, Risaw 08 : Ka Seng Eastern Naga Students’ Federation (ENSF) kala sdang ia ka jingiakhih ha ka kylla kaba nyngkong ha ka rukom jong ka jingiaid paidbah (walkathon) ban dawa la ka jong ka jylla “Frontier Nagaland” hynnin ka sngi Thohdieng.
Ia kane ka jingiaid paidbah la pynlong shibynta ban aijingkyrshan ia ka jingdawa jong ka Eastern Nagaland People’s Organisation ban pynioh la ka jong ka jylla ia kaba yn tip kum ka “Frontier Nagaland” ha baroh ki headquarter jong ki trai shnong, ki administrative headquarter bad ki sub-division kiba don ha ka thain mihngi ka Nagaland.
Ki hynniew tylli ki federation unit jong ka ENSF – ka Chang Wedoshi Setshang, Konyak Students’ Union, Khiamniungan Students’ Union, Phom Students’ Conference, Tikhir Students Union, United Sangtam Students’ Conference, Yimkhiung Akherü Arihako bad 63 tylli ki “orchestrated clusters” kiba kynthup ia ki 451 ki kynhun seng jong ki samla pule kila wan iashim bynta ha kane ka jingiaid paidbah.
Nalor kata ka ENSF kala ong ruh ba ki briew kiba dei na kiwei pat ki kynhun, kata kum ki nongialam jong ki kynhun bhalang, ki balang, ki nongialam shnong bad ki riew paidbah ruh kila wan iashim bynta ha kane ka sngi.
La ong ruh ba ki nongiashim bynta ha ki jaka bapher bapher kila rah ryngkat ia ki plakad bad leit sha ki jaka ba kongsan na ka bynta ban pynlong ia ki jingialang.
Ia ki jingpynshai kiba iadei bad kane ka jingdawa ia ka jylla “Frontier Nagaland” la pynshai hala ki jong ki ktien trai shnong hapoh ki thain lyngba ki nongialam jong ki seng samla pule.
Ka ENSF kala ong ba ha kane ka jingiaid paidbah la sakhi ia ka jingwan iashim bynta jong palat lai lak ngut ki briew ha ki bynta bapher bapher ka thain mihngi ka Nagaland, ia kaba la ong ruh ba ka dei ka jingiaid paidbah kaba heh tam ha ka histori jong kane ka thain mihngi ka Nagaland.
Na ka liang ka federation ka ai ka jingkhublei kaba kyrpang sha baroh ki hynniew tylli ki unit jong ka bad kiwei pat ki kynhun nalor ki riew paidbah halor ka jingwan iashim bynta shitrhem ha kane ka sngi.
Nalor kata kala kyntu ruh ia ki paidbah ba kin don ia kane ka juh ka mynsiem ha ki sngi ki por ki ban dang wan, kata da kaba ong ka dei ka jingkitkhlieh jong baroh ki nongshong shnong ka thain mihngi ka Nagaland ban dawa la ka jong ka jylla da kaba pynshong nongrim halor ki riti synshar khadar ka jong ki bad halor ki hok kiba kiba katkum ka histori.
Na ka liang u president ka ENSF u Chingmak Chang ha ka jingkren ka jong u, ula iai ban ha kaba iadei bad ka ioh ka kot bad jinglong ha ki kam sain hima sima hapoh ka thain mihngi ka Nagaland, ia kaba ula ong kila shah iehnoh bein halor ki kam pynroi da ki nongialam bapher bapher bapher bad ha ka sorkar.Ula ong ruh ba ki nongshong shnong ka thain mihngi ka Nagaland kila shah niewbein bad la shim ia ki kum ki nongshong shnong kiba hadien jong ka jylla.
Na ka liang ka federation kala iai ban ruh ba kan bteng ia ka jingialeh tad hadien ba kane ka jingdawa iala ka jong ka jylla kan urlong.
Nalor kata kala khot ruh ia ka jingtuklar lem ba mardor jong u Myntri Rangbahduh (PM) Narendra Modi ha kaba iadei bad kane ka jingdawa ka jong ki.
Hadien katei ka jingiaid paidbah ka ENSF kla phah ruh ia ka memorandum sha u PM Modi lyngba ki deputy commissioner ka thain mihngi ka Nagaland shibynta ban kyrshan ia kane ka jingdawa ia ka jylla “Frontier Nagaland.”
