Nongpoh, Nailar 23 : Ka Ri-Bhoi District Kickboxing Association, hynne ka sngi Thohdieng, kala plie pyrda ia ka lympung District Kickboxing Championship 2024, kaba la pynlong ha Niangbari Them, Ri-Bhoi District.
Haduh 63 ngut ki rang ba ki thei ialehkai kynthup ki Khynnah na ki shnong bapher bapher, kila wan iashimbynta ban iakhun ha ki kyrdan bapher bapher.
Ia kane ka lympung ialehkai la plie da u MDC ka Nongpoh Bah Balajied Rani ha ka jingiadonlang u President ka Meghalaya Martial Arts Federation Bah Thomas Rangthaluh, Rangbah Shnong ka Niangbari Them Bah Elfast Shadap bad kiwei kiwei.
Ka long kaba ipangmet ban peit ia kane ka lympung haba sakhi ba ki nongialehkai kila hap ban ialehkai halor ka madan khyndew kaba shu siang da ki kynja matress, namar ka jingbym lah jong ki nongpyniaid ban pynbiang ia ki jingdonkam na ka daw ka jingbym don ki nongai jingiarap.
Wat hapdeng kane ka jingeh, kine ki 63 ngut ki nongialehkai kynthup ki Khynnah haduh ki samla kila kiew ha rynsan ban pyni iala ka sap ialehkai haba buh shadien ia kiei kiei baroh tang ban ioh ia ka jingjop bad ban shah jied ha kaban mihkhmat ia ka District sha ka State Level.
U President ka MMAF, uba la long teng ruh u nongpyniaid jong katei ka lympung ha Ribhoi, u la pynpaw iaka jingkmen ban iohi ba ki nongshimti ia ka kam na u, ki la lah ban pynbteng ia kane ka lympung kaba dei ruh ka wat kaba 10.
U la pynpaw ruh iaka jingdiaw mynsiem ban iohi ba ki rang bad ki thei iakura ki hap ban wan ia shim bynta ha kane ka lympung khlem ki tiar ki tar ialehkai kiba bit ba biang, wat kane ka rynsan (matress) kam long kaba la bit ban ialehkai halor jong ka, kaba lah ruh ban pynmynsaw iaki nongialehkai lada ki kum bakla.
U bah Thomas, u la buh ruh iaka jingkyrpad na ka Sorkar Jylla ba kan phai khmat noh sha kane ka jingialehkai da kaba iarap ban pynioh iaki tiar ki tar ialehkai bad ka jaka ialehkai kaba bit kaba biang khnang ba ki khun samla kiba don iaka sap ialehkai kin nym duh jingkyrmen.
