Shillong, Naiwieng 12: Ka seng Congress kala lum haduh 10 hajar tylli tam ki jingsoi kyrteng hapoh Meghalaya kum ka jingialap ne Campaign kaba ialam da u Rahul Gandhi pyrshah ia ka jingkynnoh ba ka don ka jingbym leh hok ha ka jingpynrung kyrteng ia ki nongthep vote ha ka Electoral roll.
“Ka Congress kala sdang ia ka “Signature Campaign” ha kylleng ka ri da ka jingthmu ban pynioh haduh 5 klur tylli ki jingsoi ha kylleng ki bynta jong ka ri India bad baroh ki jylla kila noh synniang. Ha Meghalaya ruh ngi lah dep ban lum 10000 tam ki jingsoi ha kylleng ki bynta jong ka jylla bad kala sdang ban kiew da ka jingkwah ki paidbah ban ai jingkyrshan ia kane ka campaign kaban dang bteng sa ha u bnai ban wan” la ong ka Working President ka Congress ka Deborah Marak haba iakren bad ki nongthoh khubor ha ka sngi Balang.
“Kum ki nongshong shnong kiba don ka jingkitkhlieh, ngi kyntu ia ki paidbah ba kidei ban shim ia ki jingpyntip halor kane ka mat bad ban pyndonbynta lang ha kaban don ia ka jingiatai kaba dei ban pynthikna ia ka jingtreikam ryntih ki jaka treikam bad ruh ia ka rukom treikam ka jongki. Wat ai ba ka jingsngap jar ka jong phi kan long ka jingplie lad ia ka juk jong ka jingthombor” kala ong.
Ka Marak kala ong, ba ka Congress hapoh ka jingialam u Rahul Gandhi kala trei khlem shongthait ban pynlong ia ki jingialap bad ban rah ia ka mat kaba khraw kaba buh ha ka jingma ia ka jingdon ka synshar paidbah hapoh ka ri.
Kane ka mat kadei kaba sngewkhia shaphang ka koit ka khiah jong ka riti synshar paidbah ha ka ri bad ka jinglong kordor jong ki kam kiba iadei bad ka elekshon. Ka jingiaid shaphrang ka jingknieh bad jingtuh iaka vote da ka BJP ha kylleng ka ri bad ka sabut kaba biang eh kadei kaba jia ha Haryana, Madhya Pradesh, Chhattisgarh bad Maharashtra.
“Ka don ka jingleh bym hok ha kaba iadei bad ki kam elekshon, ka BJP bad ka Election Commission kila donkti ha kaban tuh ia ka vote ne “vote chori” ban iashah ia ka seng kaba ialam ia ka jingsynshar.
Kala ong ba ka elekshon ki long ki maw jong ka riti synshar paidbah ha ka ri ong ka Deborah bad ka ong “Haba u mawnongrim ula mad ia ka jingshah tynjuh namar ka jingleh buittuh ia ka vote, ka lawei jong baroh ki nongshong shnong kan makna lut. Ban shong sngap ha ka dur jongka jingkynnoh ba kala don Ka jingsynshar kaba donbor bad ki nongtuh vote kan pynshlur ia kito kiba thmu ban niewbein ia ki jaka treikam ka riti synshar paidbah bad ban pyntroin̈ ia ka mynsiem ieid ri ka jong ngi”
