Shillong, Nohprah 31: Ka Bharatiya Janata Party (BJP) Meghalaya hynnin ka sngi kala pyllait paidbah iaka Video haba iadei bad ki lad kumno ban iakhun pyrshah ia u drok hapoh ka jylla bad ka ri India baroh kawei.
Ha kane ka sngi ka Meghalaya BJP kala pynbna ruh haduh 8 tylli ki mat kumno ban iakhun pyrshah ia u Drok ba kynthup ban iatreilang bad kiwei ki sorkar jylla, ban thaw daka Northeast Anti Drug Squad, ban don daka Directorate of Prosecution ha Meghalaya, ban thaw daki jaka sumar sorkar naka bynta ki shynrang bad kynthei ba kyrni drok, ban iarap pisa iaki jaka sumar riew shimet, ban ai jinghikai halor u drok iaki skul bad kolej bad ban pyndonkam daki samla ban ialap halor ka jingma u drok bad ban ai jingsumar ei iaki samla ba kyrni drok.
Ha kane ka sngi ka Meghalaya BJP kala sam ruh ki tiar jingialehkai iaki samla kum Jerseys kum shi bynta ban pynshlur iaki samla ban shim bynta ha ki jingialehkai naka bynta ban lait naka jingkyrni drok.
Haba kren ha kane ka sngi u president ka Meghalaya BJP u bah Ernest Mawrie ula ong ba ka party kan wanrah shibun ki prokram naka bynta ban pynshlur bad kyntiew iaki samla ban shim bynta khnang ba kin lait naka jingkyrni drok.
U bah Ernest ula ong ba kine ki Prokram kim dei tang ban ialap ilekshon hynrei kadei namar ka Party ka sngewkhia ban iohi ka jingbun kiba kyrni Drok hapoh ka jylla namar kumba haduh 2.5 lak ngut ki don kiba dih drok.
“Haduh 30% ki samla ka jylla ki dih drok bad dei namar kane ka BJP ka don ka thong ban rat dkhong ia baroh ki jait drok ym tang hapoh Meghalaya hynrei ha baroh kawei ka ri India bad naka liang ka sorkar pdeng ruh lyngba u myntri ka tnat kam pohing u Amit Shah kala shim khia ban pynthikna ban rat dkhong ia u drok” la ong u bah Ernest.
U bah Ernest ula pynbna ruh ba ka BJP kan pynlong daka jingiaid paidbah haka 7 tarik Kyllalyngkot 2023 ha Shillong ban ialap paidbah halor ka jingsniew ki jait drok.
