Shillong, Naitung 24: Ka Badminton Promotional Group Shillong, ha ka sngi Palei, kala plie paidbah iaka Badminton Promotional Tournament 2025 ba la pynlong ha JN Indoor Sports Complex, Polo.
Ïa kane ka lympung ialehkai Badminton ba 3 sngi la wan plie da u Dr W Kharshiing u President ka Meghalaya State Badminton Association (MSBA).
Ha kane ka lympung kin don haduh 273 ngut ki nongïashim bynta ha 6 tylli ki thup katkum ka rta kynthup Under-11, Under-13, Under-15, Under-17, Under-19, and Senior divisions.
Iaki jingïalehkai la phiah haki Boys, Girls Singles bad Doubles bad Mixed Doubles haka thup Senior Category.
Hynne ka sngi ba sdang haduh ka por 5 baje janmiet la pyndep haduh 54 tylli ki jingialehkai, bad haka sngi ba ar kin don 48 tylli ki jingïalehkai kaba kynthup ia baroh ki rta.
U Organising Secretary M Iacais, Secretary T. Dienngan bad President K Pyrtuh jong ka Badminton Promotional Group ki la pynpaw ïa ka jingkyrmen ba kane ka lympung kan long kum ka rynsan ban wad bad kyntiew ïa ki sap ki phong bad ha kajuh ka por kan pynroi ruh ïa ka jingïalehkai badminton hapdeng ki samla.
Kane ka lympung ïalehkai kan bteng haduh ka 26 tarik Naitung ha kaba ki jingïalehkai kiba dangsah kynthup ka phainal kin long ha ki ar sngi ban wan.
