Nongpoh, Ïaïong 19: Ka District Sports Ophis Ribhoi, hynne ka sngi Balang ka la ïoh ban sdang biang ïaka Chief Minister’s Inter-School District Level Athletic Meet 2023 kaba 3 sngi, ïakaba la pynlong ha madan ïalehkai Kurkalang Bhoirymbong.
Ïa kane ka Athletic meet la wan ban plie pyrda da u Bah MB Tongper Adl. DC Ribhoi kum u kongsan haka jingïadonlang u bah S Pasleiñ DySP Ribhoi kum u symbud kongsan, u bah Bobby L Nongbet District Sports Ophis Ribhoi, Ki official jong ka Tnad DSO Nongpoh, Ki Nonghikai lem bad ki khynnah skul.
Ha kane ka Athletic Meet ka ba 3 sngi la wan ban ïashim bynta daki khynnah skul jong ki 32 tylli ki skul na ka them Ri Bhoi District bad ha kine ki 3 sngi, ki khynnah skul kin sa ïaskhim bynta haki jingïakop bapher bapher kiba kynthup naduh ka jingïakop mareh kaba 100m, 200m, 400m, 800m, Long jump, High Jump, Javelin throw, Discus throw, shot put bad kiwei kiwei.
Haba ai jingkren, u Bah Bobby L Nongbet u la pynpaw ka jingkmen ban ïoh pynlong ïa kane ka lympung khnang ba ki khynnah skul kin ïoh ban pyni ïaka sap ha ki jingïakop bapher bapher. Ula ong ruh ba kane lympung ka long ruh kum shibynta ban ïoh ha ka ban sei ïaki rang bad ïaki thei kiba kynsai ban ïashim bynta sha ka Inter-School State Level ka ban sa long shen ha nongbah Shillong.
Haba kren kum u kongsan, u Bah MB Tongper, u la ai ia ka jingiaroh ia ka ophis u DSO kaba la lah pat ban pynlong ia kane ka lympung ialehkai kaban long kum ka rynsan ban pynskhem ia ka sap ialehkai jong ki khynnah skul kiba don ia ki sap ialehkai ha ki jingialehkai sport bapher bapher.
