Shillong Iaiong 16: U President ka National People’s Party (NPP) Meghalaya Bah Prestone Tynsong, hynne ka sngi Baar, ula kyntu ia ki paidbah ba kin ai jingkyrshan iaka kyrtong ka NPP Kong Ampareen Lyngdoh ha kane ka elekshon Lok Sabha na Shillong Parliamentary constituency, ha ka jingialang kaba long ha Smit, Nongkrem Constituency, kaba dei ka ktem jong u Nongialam ka Voice of the People Party (VPP) Bah Ardent Miller Basaiawmoit.
Haba kren ha katei ka jingialang paidbah, u Bah Prestone ula kyntu ia ki paidbah ba ki dei ban kyntait ia ka VPP kaba pyrshang ban ialam bakla ia ki paidbah da ki kam thok kam shukor suda.
Une u nongialam ka NPP ula ong, ba ka dei ha ka sien kaba nyngkong ba ula wan iuhkjat ha ka constituency u Bah Ardent ban ialap elekshon hynrei u Bah Ardent ula leit palat ia ka 50 sien ha Pynursla constituency.
“Ka sien kaba khatduh kaba u (Ardent) la leit ha Nongshken, kaba dei ka MDC constituency jong ka Kong Grace Mary Kharpuri , ula kynnoh ba u Bah Prestone Tynsong bad ka Kong Grace Mary Kharpuri kila donkti ha ki kam bamsap bad kumta kala dei ka por ia ki paidbah ban jied noh ia ka VPP namar ba ka ieng na ka bynta ka Clean Politic ne ka kam Saiñ Pyrthei kaba khuid bad ka synshar khaddar kaba khuid, hynrei haba uwei u briew ula kylli ia u Bah Ardent naei yn sdang ban pynkhuid noh ia ka kam saiñ pyrthei (cleaning politics) ia kaba u Bah Ardent ym shim la lah ban jubab satia” ong u Bah Prestone.
U Bah Ardent, uba la sdang ia ka Clean Politics ha ki snem 2013, u dei u juh u briew, uba siew ia ki paidbah ban wan sha ka jingialap elekshon ka seng. “Hato phi tharai kane ka dei ka Clean Politics? Kumta kam long kaba suk” ula ong.
U Bah Tynsong ula pynkynmaw ruh ba ka jingialap elekshon ka VPP ka jan iasyriem bad ka jingpyrshang ha u snem 1999 ha kaba uwei u nongialap uba ialam bakla ia ki paidbah ba ka pyrthei kan wai ha u snem 2000 bad kumta ki briew kiba ngeit ia u, kila phet sha khlaw bad kila aiti lut ialade ia ka jingdon jingem bad ia ka spah ka phew hynrei hadien 24 snem kitei ki longiing kila im noh ha ka jingduk jingkyrduh.
“Kane ka dei ka por bala thaw ia kum katei ka Party (VPP) ha Meghalaya, kaba pyrshang ban ialam bakla ia u paidbah da kaba ong ba ka jaidbynriew mynta ka don ha tmer ka riat bad kam don jingkyrmen shuh. Kane ka dei tang ka jingialam bakla bad ka jingthok jingshukor. Ngan iathuh ia phi ba ha ka Mang Tyngka ha ka por jong u Captain Williamson Sangma kum u Myntri Rangbah bad u Bah BB Lyngdoh kum u Myntri ka Pla Tyngka, ka mang tyngka jong ka jylla ka long tang T.5000 Klur hynrei mynta ha ka sorkar MDA ha u snem 2024, kala ai jingmynjur ia ka Mang Tyngka kaba palat ia ka T. 27,000 Klur. Hato phi tharai ba ka jylla kala nang hiar shapoh, Em ka jylla kala nang iaid shakhmar ha kaba iadei bad ka roi ka par ha baroh ki liang” ong u Bah Prestone uba long ruh u Symbud Myntri Rangbah ka jylla.
“Nga sheptieng ba kum kine ki Party (VPP) ki pyrshang ban ialam bakla ia ki samla da kaba ong ia ki ban rung sha ka seng khnang ba kin ioh ia ki kam sorkar, hynrei nga lah long kum u MLA la bun snem, Ngam nud ban ai ia kum kitei ki jait jingkular ia ki paidbah” ong u Bah Prestone.
Ula pynpaw ia ka jinglyngngoh ba ki paidbah kim shym la jed ia u MLA barim ka Nongkrem u Bah Lambor Malngiang ha ka elekshon MLA 2023.
U Bah Prestone ula ong, “Ki paidbah ki khot ia u (Ardent) da u Boss hynrei ngan ong ia phi kan long kaba lehnohei ban long u Boss lada phim don ha ka sorkar kaba synshar ia ka jylla”.
Ula ther ruh ia u Bah Ardent u bym shim la don satia ia ka jingkitkhlieh na ka bynta ban wanrah ia ki kam pynroi hapoh ka Nongkrem constituency.
“Haba phi (Ardent) kanbas phi ong, sngewbha vote ia nga khnang ba ngan wanrah ia ki kam pynroi bad mynta haba phi lah shah jied phi kylla noh ia ki kyntien ki jong phi bad ong pynban ba kadei ka kamram bad ka kam jongu Bah Prestone Tynsong, Sniawbhalang Dhar bad Kong Ampareen Lyngdoh ban wanrah ia ki kam pynroi ha ka constituency jong phi?” la buh jingkylli u Bah Prestone Tynsong.
“Dang ha ki 2 bnai kiba la leit, ka Kong Ampareen kala wan ban jurip ia ka PHC ha Nongkrem, phi (Ardent) ong ba ym don shuh kum ka Kong Ampareen bad mynta ha ka por elekshon, phi bad ki nongkyrshan ki jong phi, phi kynthoh pynban ia ka (bad ka pyndonkam da ki ktien kiba khor bad tohmet ia ka)” ula ong.
U Bah Prestone ula kyntu ia ki paidbah ka Nongkrem constituency ban vote ia ka NPP namar kan long ka burom kaba khraw ia ki paid jong ka rilum Khasi-Jaintia lada ka Kong Ampareen ka shah jied kum ka MP ha Parliament namar kan mihkhmat ban pynsawa ia ka sur jong u paidbah.
